لاتطلبوا العلم خلاص..2

[Al-wawi]

بسم الله الرحمن الرحيم...

رواد الساحة الاكارم...هل تذكرون الوعد الذي وعدتكم اياه...هاهو قد حصل..


انني اكمل قصة جابر والمدرسة والتي كانت بعنوان "لا تطلبوا العلم خلاص..." ولكن مع رواد الساحة كممثلين.


واليكم التكملة:


اخذ جابر يقرا دروسه في ذلك اليوم,ومر عليه صديقه الحميم المتوهج.....ودق جرس منزلهم.


جابر: من ؟


المتوهج: انا ربيعك "صديقك"..تعال بنلعب كورة "كرة القدم"..


جابر: مابلعب اليوم وراي مذاكرة وايدة.. وبعدين زواج..


المتوهج: من متى وانت اتذاكر؟


جابر:خلاص من اليوم ورايح بذاكر وبستوي اشطر عنك...وبطلع الاول على الكل حتى على شامس..شو على كيفه يطلع دوم الاول؟


المتوهج:خلاص بذاكر معاك عشان انت تطلع الاول وانا الثاني..


جابر: حياك الله..


واخذ الاثنين يذاكران من العصر الى العشاء... حتى مل منهما الكتاب.


وفي اليوم الثاني:


استيقظ جابر على غير عادته قبل ابيه وامه واذن لصلاة الصبح فقام وايقظ امه:


امي دمعة...قومي اذن الفير "الفجر"... بسج رقاد.. وهاي صلوحة "صالحة" بعدها نايمة من البارحة العصر.. ايش ها؟


دمعه: وانت ايش نششك "قومك"...هالوقت...مب من عادتك؟ بس جزاك الله خير..قم قوم ابوك اتحصله خامد في غرفته..هالتعبان من كثر الاكل ما يروم ينش..


واستيقظت العائلة الكريمة وصلوا الصبح وافطروا وبدا كل واحد بالذهاب لعمله..ومر ابونواس بباص المدرسة يريد ان يقل الطلاب الى مدرسة


الساحة العربية في مدينة فارس في دبي...


(لاتصدقون)


جابر: بونواس كيف الحال؟


بو نواس: هلا جابر..كيف انت؟ فرحان اشوفك؟


جابر: اسكت.. انا اليوم بصير اشطر واحد في المدرسة..


بو نواس: اشطر واحد في المدرسة مرة وحدة؟؟ كيف؟


جابر : البارحة يلست اذاكر دروسي وزيادة على دروسي كنت اتعلم الاملاء عن طريق الرسوم المتحركة.. اشوف رسوم السنافر ويوم اسمعهم اكتب اللي يقولونه.. مب فنان انا؟ مب جي بعد.. حتى اني رحت اعود عمري على الرياضيات والجمع والطرح قول كيف... عن طريق اني استلف بيزات من امي واروح للهندي في البقالة وكل ما اشتري شي وادفع ثمنه اشتري شي غيره اما ارخص عنه او اغلى عنه واشوف كم يرد لي او كم ياخذ عني وكذه اقوي عمري في الرياضيات..حتى اني في الاخر عطيته بخشيش..


بو نواس: ماشاء الله عليك طالع على ابوك ذكي... اقول انا عندي مشكلة ما عندك لي حل؟ بغيت اخطب بس ما عندي بيزات "فلوس" ايش اسوي؟


جابر: انا لو منك اروح واعمل توصيل للمدرسين بباص المدرسة واخذ عنهم على التوصيل وبعد يمكن اعمل لهم خدمات لتوصيل حاجيات المنازل بس كل شي بثمنه ويمكن حد من المدرسات تعطيك ويه وتتزوجها..


بو نواس: هي والله خوش فكرة.. بس وايدات منهن عندهن سيارات..


جابر: ماعليك... بنبنجر "نفسد" تواير سياراتهن...وبعدين محد غيرك ..بس تعال الناظر بيسوي عمره يعرف الاصول.. خلاص بنبنجر تواير السيارات كلها.. وخاصة سيارة بوالطواري اللي شراها من فلوسنا حتى يقولون انه تزوج من فلوسنا..دنيا..


وكلمة من هذا وكلمة من ذاك حتى اشتد الحديث فقصرت المسافة فوصلوا الى المدرسة بسلام.. وعند باب المدرسة كان المشرف ابو الطواري ينتظرالطلبة


وهو كعادته يقف عند الباب ليعاقب فيما بعد المتاخرين بالضرب .. فهو له اسلوبه في ضرب الطلبة مرة ب "الشلوطة" ومرة ب "علقة" واخيرا ابتكر طريقة اخذ مصروف الطالب ..وهي لا تسمى سرقة عنده بل تعزير..


ابو الطواري: جابر من وقت جاي اليوم...خير ان شاء الله.. اكيد فلوسك خلصت..


جابر: لا ماعليك.. مال الحرام اللي خذته عني بطلعهم منك...


ابو الطواري : مال حرام يا قليل الادب؟


جابر: مب قصدي.. لكن والله حرام عليك نزلت عشرة كيلو ابسبة الجوع..بعد ما كنت تاخذ عني بيزاتي..


ابو الطواري: دواك..يالله روح على الطابور..


ودق الجرس معلنا بدء الطابور الصباحي... وفي هذه الاثناء قامت الاخصائية الاجتماعية


بلقيس


بالاتصال بناظرالمدرسة


"غريب"


وذلك لانه معتاد على ان يتاخر عن الدوام..


درررن......درررن...


-غريب: الو... لو هذا انت يا جابرو ترى بفصلك من المدرسة...والله


بلقيس: هذا انا بلقيس... شو جابر شو سوى بعد؟


غريب: اهلا بلقيس.. والله كاره حياتي ابسبته..غبي وامرفع ضغطي.. تخيلي البارحة اراويه صورة حصان اقول له هذا ايش اسمه يقول لي بعدنا ما سميناه.. بس تقدر اتقول سلسبيل.. واقول له ابوك شو يشتغل يقول لي قصاب ويوم عرفت انه دكتور اساله ليش اتكذب قال انا ما كذبت شو الفرق بين الدكتور والقصاب؟.. اتصدقين حلمت انه جاي يذبحني ويقول انا قصاب..


بلقيس: ما عليك منه... تراه غبي.. حتى في الاحلام


غريب: والله هذا اذا غبي انا ما افهم... هذا بيجنني وبيستوي في يوم من الايام ناظر المدرسة ابدالي..عارف مخططاته... خلاص ما بداوم اليوم من الحسرة..


بلقيس: لازم اتداوم اليوم ترى وكيل الوزارة سيبويه بيمر علينا... واذا شافك متاخر هالمرة بعد ترى يمكن يمشكلك.. وبعدين لازم اتدور على اي مشكلة نطرد فيها جابر من المدرسة عشان ما يفضحنا ويا وكيل الوزارة مثل المرة السابقة..


غريب: هي والله... قاله ابوي يسلم عليك..قال له ابوك منو قال له ابوي الدكتور محمد اللي سوى لك عملية الزايدة الدودية يوم ماكل شرات البعران.. عن ابوه استح على ويهك وكيل وزارة وبطنك نافخ.. والوكيل طلع محمر ومخضر..اووف...خلاص يالله عشر دقايق واكون عندكم.مع السلامة.


ولكن..دررن درررن...من جديد..


غريب: الو..


الهمزة "وهي مدرسة الرسم والخط": غريب ايش ها... وين همزات الوصل والقطع الله يقطع ابليسك.. انا ايش دراني ايش انت كاتب... ما اقدر اكتب الكلام اللي انته كاتبه للوكيل اذا ما اعرف اقراه.


غريب: حتى هني.. خلاص اخر مرة... بس خطج وايد احلى من خطي وما احد مثلج..


الهمزة: الخلاص هالمرة سامحتك.


وانتهت المكالمة.. وخرج غريب من منزله الى المدرسة وفي نصف الطريق تذكر انه قد خرج ببيجامة النوم فرجع وغير ثم عاد لهدفه..


ترى ماذا حدث في الطابور ثم عندما جاء وكيل الوزارة..تابع معنا..

[بقايا جروح]

هاهاهاهاهااااااااااااااااااااااي..
صراحه انت يا الواوي مبدع.
مستويلنا طه حسين
لا وبعد ابرك عنه..
عاد لازم تذبح فضولي يعني
وتخليني اتلريا التكمله...
يالله مسموح هاي المره..
بس لا تكون انته طالع على سيبويه وتاكل
شرات البعير.. ترى انا بعد اكل شرات الناقه
والله امزح..

------------------
من يشتري قلبٍ همومه ملايين...
ويبيعني قلبٍ من الهم خالي..

[غريم الشوق]

والله امتعتنا يالواوي بهالجزء بس انته جيه ناوي تجتل فظولنا..
نتريا الجزء الثالث بفارغ الصبر..

------------------
كنت اكثر الناس مؤمن بالوفا واهجر..
واليوم نفس طواها الشك..يا كافي.

[Al-wawi]

الأخت الكريمة:بقايا جروح

شكرا جزيلا على اطرائك الطيب..
ومب زين تاكلين واايد...اقول كم الوزن؟:"امزح والله"

الأخ الكريم:غريم الشوق
شكرا لك..صراحة انا ناوي اقتل فضولكم..مات ولا بعده؟؟

[بقايا جروح]

الله يهديك بس لازم تفشلني..
انا مابا احدد عشاني استحي
بس تقريبي يعني
ضعف وزن الفيل مرتين..هاها
بس بعدني ماعديت عن وزنك..هاهااااي

------------------
من يشتري قلبٍ همومه ملايين...
ويبيعني قلبٍ من الهم خالي..