اعلان

Collapse
No announcement yet.

غَنُّو

Collapse
X
  • تصنيف
  • الوقت
  • عرض
Clear All
new posts

    غَنُّو

    غَنُّو ،،

    الغَيْنْ حَرْفْ زِينْ
    يَشْبَهْ العَيْنْ فْبَزَّافْ
    وَ العَيْنْ عَيْنِي
    وْ عَيْنَكْ أُو عَيْنْ النَّاسْ
    دَلَّتْهُمْ الرَّمْشَة
    رَعْدَتْهُمْ الدَّهْشَة
    جَاتْ شُوفَتْهُمْ حَرْشَة
    مَا گَرْ فِيهُمْ مَخْطَافْ
    شَافُو شْوَيَّة شَافُو بَزَّافْ
    حْتَى ضَرَّتْهُمْ الشُّوفَة
    أُو خَرْجَتْ بْكَا
    بِينْ دْمُوعْ اخْفَافْ
    تْخَلْطُو شْفَارْهُمْ عَالكْتَافْ
    حَارْ فِيهُمْ النَتَّافْ
    مَا گَالُو لِينَا حَافِي
    وَلَّا رْمُوشْهُمْ ارْهَافْ
    العَيْنْ غِيرْ شُوفَة امْثِينَة
    اتَّقْرَا حَرْفْ بْحَرْفْ
    وَ اتْهَجَّى عْلَى حَدْ العَرْفْ
    وَ تْڭَُولْ الحُڭَْرَة وَلْفْ
    رَضّْعَتْ فِيهَا الدَّمْعَة
    قْرَاوْهَا غَيْنْ
    وَ الغَيْنْ غَا وْعُودْ
    غَا كْلَامْ مَوْشُومْ
    فِظْهَرْ الكْذُوبْ خَلَّا لَمَارَة
    نَذْبَة اتْحَرْفَتْ فِالكْتُوبْ
    الغَا لَغَّايَة كْلَامْ مَرْعُودْ
    هَزَّاهْ الرِّيحْ فِعْمُودْ
    گَالُو لِينَا مَكْتُوبْ
    غَا كَتْبَة
    مْحَرْفَة مَبْيُوعَة لْغَدَّا
    غَا حَجَّايَة
    اسْمَعْتْهَا البَارَحْ
    فِاخْرَايَفْ جَدَّة
    غا كُدْيَة
    مْنَذْيَة هَدَّتْ الرُّكْبَة
    شِي اطْلَعْ
    أُو شِي اعْثَرْ فِالعَتْبَة
    گَالُو غَا :
    عَهْدْ قْدِيمْ وَ اتَّلْغَى
    گَالُو غَا :
    مَاتْ وَ اتَّنْعَى
    وَ الغَا مَا تَنْفَعْ رَضَّاعَة
    مَا تْرُدْ المْرَا لْبِيتْ الطَّاعَة
    الغَا : غْلَالَة
    دَارُوهَا فِالدْلَالَة
    تْنَكْرَتْ لْمُولَاهَا
    فَرْخَتْ فِيهُمْ سْلَالَة
    الغَا : غا نْدِيرُو اعْرَاضَة
    نْفَرْشُو الصَّالَة نْدِيرُو جُوقَة
    وَ نْفَرْقُو الوْرِيقَة المَسْرُوقَة
    الغَا : غَا نْحَيْدُو
    البُوقْ لَمَّالِينْ السُّوقْ
    نَاخْذُو لُو خَيْطْ امْثِينْ مَنْ العْرُوقْ
    نْرَبْطُوهْ بْبَاڤْ وَ نْطَلْعُوهْ الفُوقْ
    يَمْكَنْ يْسَمْعُونَا بَزَّافْ
    يَمْكَنْ يْفَهْمُونَا شْوَيَّة
    يَمْكَنْ نْبَطْلُو لِيهُمْ الثْقَافْ
    وَ يْعَرْفُو السْوِيقَة
    مَاشِي غِيرْ صَنْدُوقْ أُو وْرِيقَة
    مَاشِي كَسْدَة بْلَا اكْتَافْ
    مَا اتْخَوَّفْ مَا اتْخَافْ ،،

    غَنُّو ( 1 )
    الزجال حكيم البورشدي
    برشيد 17 أبريل 2017

    #2
    مرحبا اخي حكيم وحشتنا كلماتك وابداعاتك وهاهي زجلياتك ايضا تكتسح الصفحات مااشاالله عليك ربي يحفظك ويديم مداد هذا القلم الرائع
    دائما جميل بتواجدك وبكل ما تطرحه من اعمال متميزة
    تحياتي لك

    تعليق


      #3
      هلا هلا والف هلا
      بالبورشيدي
      بالزاف اشقنا لهالحرف وصاحبه

      ههههههه
      وينك بالله وليش الغياب

      بجد افتقدناك

      اهلا بعودتك

      تعليق

      Working...
      X