~ عامٍ بدونك ~
(( ترنيمة ِفقْد لزايد الخير ))
رحمه الله
بعدك تمرمر و اختلف طعم الاصباح
وينه صباح الخير ؟ ! و الخير فالك
رحت وحبست الوقت في غابة اتراح
كنّك أخذت الابتسام فْ رحالك
رحت و تركت قلوب مليانه اجراح
و عيون خاوي عرشها من وصالك
فيك القوافي (خِرْس ) مكسورة اجناج
يصعب عليها تقول .. ترثي خصالك
بعدك يتيم الطيب و الخير و اروااااح
اتحيدها يا ( شيخ زايد ) فدالك
يا بوي زايد يعلم الله بالافراح
عيّت تقارب دارنا و انت هالك
عامٍ بدونك بعد عام انقضى و راح
و الارض ما زالت كئيبة مسالك
تنشد عليك ( العين ) و افلاج نِضّاح
و تبكي على فرقاك ( ُصوفة ) اعقالك
و تنعي مضامير السِبق وجه وضاّح
و يْبان في عين المكان ارتحالك
و يحّن لك مسجد به الذكر فوّاح
يتمنّى ِسجّاده خشوع ابتهالك
أظلم ( حفيت ) بغيبتك و الحزن لاح
في كلّ شبرٍ ثم لبس صمت حالك
حتى السواحل تنتحب و البحر صاح
ما شاقها موجٍ بعد عين جالك
امسات مرّيت الحِلِم طيف لوّاح
طلّة جبينك بشّرتني بحالك
شفت الصحاري تبتسم لك و تنزاح
و يخضّر قاصيها بخطوة جلالك
تمشي و حوالينك صقورٍ كالارماح
نصهم بشر و البعض الآخر حلالك
و بانت على وجهك بشارات تفلاح
ثم ارتفع ب ( الله و اكبر ) مجالك
شفتك شموخٍ مانحنى قط او طاح
الا لوجه اللي حباك اعتدالك
و شفتك على خبري كريمٍ و لمّاح
تحتار في يمناك مَدّة شمالك
و رغم ارتباك الحلم بالصبح اللي لاح
هنّيت عيني بالكرى يوم طاالك
و آمنت باللي فصّل و صاغ الالواح
اللي مقاديره لزومٍ تنااالك
مثلك مقامه جنةٍِ عطرها فاح
بين القصور اللي بنتها ( ِجزالك )
اتخيّلك في وسط روضه و مرتاح
ما هزّ بالك غير راحة اعيالك
و
شعبك على فقدك قضى عامه انْواح
محدٍ يلوم اللي فقيده مثالك ..!!
هنادي الجودر
11/11/2005