فِالعْرَبْ طَلْگَتْ وْشَامْ
ارْبَعْ لْوَانْ يَا فْلَانْ
نَجُّوهُمْ القْلَامْ
حْكَايَة عْلَى حَايْكْ لِيَّامْ
مَنْ احْتِيتْ الكْلَامْ
خَرْجُو حْرُوفْهُمْ
بَارُودْ أُو حَبَّة
اتْفَرْقَتْ عْلِيهُمْ السَّرْبَة
بِينْ المْقَدَّمْ وَ الحَزَّانْ
شِي يْنَجْ
أُو شِي يْخَبَّلْ الكُبَّة ،،
ارْبَعْ لْوَانْ يَا فْلَانْ
تْبَاهَاوْ بِهُمْ القْوَامْ
نَجُّو مَنْ سْدَاهُمْ جَلَّابَة
حُرَّة بِالقْضِيبْ مَزْدِيَّة
عِينْ أُو عُقْدَة ارْبَعْ حَبَّاتْ
امْسَرْسْبَاتْ بِالقْوَامْ
إِلَى مَا غَطَّاتْ
بِالسْتَرْ مَا تْعَرِّي رُكْبَة
مَا تْغَرْغَرْ عِينْ
مَا تْكَحَّلْهَا نَكْبَة
ارْبَعْ لْوَانْ ،،
مَا فَرْقَتْهُمْ مَلَّة
وَلَّا زَيْغَتْهُمْ ادْيَانْ
ما گَرْ فِيهُمْ اخْصَامْ
وَلَّا طَلْگَت فِيهُمْ
المْحَبَّة اليُومْ اسْقَامْ
ارْبَعْ لْوَانَاتْ صَامْدَاتْ
بِينْ لَرْيَاحْ الهَايْجَاتْ
بِدْمُوعْ الفُرْقَة الحامْيَاتْ
اللِّي سَكْنَتْ
فْدَمْنَا وَ اجْرَاتْ
اكْتَبْنَا حْرُوفْهُمْ اقْصِيدَة
فِخَدْنَا اوْشَامَاتْ
نَتْبَكَاوْ عْلِيهُمْ عْيَالَاتْ
وَقْتْ انْعِينَا الخَيَّالَة
مَا بَانُو خِيلْهَا
بِينْ ذُوكْ الخْيَالَاتْ
خَرْجَتْ النَّخْوَة زَگْيَة
يْعَدْدُوهَا وْرَانَا العَزَّيَاتْ
ارْبَعْ لْوَانْ فِعْلَامْ
مَا هِي اعْكَرْ وَلَّا دْبَاغْ
ولا جْلَاخَة طَلْگَت
فْدَاكْ الكَتَّانْ اصْبَاغْ
ارْبَعْ لْوَانَاتْ نَاصْعَاتْ
مَا فَرَّقْ بِينْهُمْ مُنْكَرْ
وَلَّا اتْهَدْ گْدَرْهُمْ اغْدَرْ
وَلَّا تَلَّاتْهُمْ رِيشَة
بِينْ الغْرَامْ تَايْهْاتْ
هُمَا نَجْمَاتْ فَحْلَاتْ
شَرْبُو مَنْ بِيرْ العَاگْرَاتْ
تْوَلْدُو فِينَا حُرَّاتْ
ارْبَعْ نَجْمَاتْ امْخَاوْيَاتْ
عَلَّاوْ فِِعْمَانَا ضَاوْيَاتْ
خَلَّاوْ لْوَانْهم
فِالجْذَرْ رَاشْگَاتْ
هُمَا اوْشَامْنَا
هُمَا گْلُوبْنَا إِلَى حْيَاتْ
ارْبَعْ لْوَانْ ثَايْرَاتْ
يَرْمِيوْكْ فِالثَّلْثْ الخَالِي
إِلَى عْرُوشْهُمْ سَكْرَاتْ
وَلَّا حَنَّتْهُمْ فِيدِينَا
خَلِّينَاهَا فِالظَّلْ دَبْلَاتْ
الكْحَلْ وَجْدْنَاهْ لِعْزَانَا
إِلََى غَطَّانَا مَا يْدَفِّي عْرَانَا
رْسَمْنَاهْ غْرَابْ
مَنْ كْحَالُو كَحَّلْنَا بِمَنْقَارُو
دَرْدَرْ تْرَابُو فِالعَيْنْ
إِلَى زَگَّاهَا الغْدَرْ
عْرَفْنَا بِاللِّي
دَارْهَا فِينَا وَ عْمَانَا
البْيَضْ مَنْ طْهَارْتُو
غَطَّا عَارْنَا
دَرْنَاهْ لِرْجَالْنَا اخْمَارْ
لَبْسُوهْ مَنْ لِيلْتُو احْزَانْ
عْلَى ذِيكْ الخَيْمَة
اللِّي ارْشَاتْ
أُو گَلَّعْ صْدَاهَا
ذِيكْ الوْتَادْ الرَّاشْيَاتْ
مَلِّي التْبُورِيدَة
عَوْدَتْهَا الحُرَّة فِدْيَارْنَا
مَا حَنْحْنَتْ گََدْ مَا زْگَاتْ
مَنْ بْيَاضُو
دَرْنَاهْ كْفَنْ لِينَا
مَا عَرْفْنَا نْعِيوْهْ وَلَّا يَنْعِينَا
وَلَّا يَحْيِي فِينَا نَخْوَة
وَمَا يْخَلِّي دَمْنَا
تَخْرُجْ اسْبَاوْتُو مَنْ فَمْنْا
رَغْوَة
إِلَى كَانْ الخْضَرْ
فِينَا لُو شَانُو
نْدِيرُو طْرِيبْشَاتْ
أُو مَا تَبْهَاتْ لْوَانُو
نْشُوفُو كَرْمَة وَلَّا شَجْرَة
مَا نْخَلِّي عْرُوشْهَا يَدْبَالُو
مَا نَهْدِي زِيتُونُو
وَلَّا وَاحَدْ مَنْ اغْصَانُو
إِلَى كَانْ الخْضَرْ
فِينَا اوْرِيقَاتُو حَنَّة
فِالأَرْضْ يَطْلَگْ
رِيحْتُو وَ انْسَامُو
عْلَاشْ مَا تْكُونْ
بْلَادْنَا جَنَّة
مَا يَقْرَبْهَا جَنْ
أُو مَا يْحَرْثُوهَا اقْرَانُو .
يَاكْ الحْمَرْ
يَتَّلْبَسْ زَاهِي
بِينْ اخُّوتُو قَايَدْ لْوَانُو
نْطَرْزًُو حَبَّة حَبَّة بِالحْرِيرْ
وَ يْكُونْ خَيْطُو بِالظْفِيرَة
عَالمْحَبَّةً مَنْ قْوَامُو سَاوِي
نْعَطْرُو بْخُورْ
وَلَّا جَاوِي مَنْ المْرَشَّة
حَبَّاتُو مَنْ عُودْ قْمَارِي
تَخْرُجْ رِيحْتُو حُرَّة
تَرْخَفْ عُگْدَةْ الحَرْفْ
و تْخَلِّيهْ فِسْكَاتْنَا دَاوِي
لَبْسُوهْ سْيَادِي
فْلِيلَة الجَدْبَة گْنَاوِي
مَلِّي تَرْشَمْ بِالدَّمْ
شَفْنَا طْقُوسُو نَدْبَة
وَگْفُو عَلِّيهَا الحَضْرَة
جَاوْنَا بالعْزَا
و كْلَامْ مَا يْسَاوِي
مَلِّي زْگَاتْ الضَّرْبَة
تْلَاحِينَا اغْدَرْ
مْعَ البْهُوتْ مْخَاوِي
تْرَشْگَتْ فِينَا خْنَاجَرْ ،،
فْسِيفْةْ العْدَا
خَرْجَتْ السَرْبَة بْلَا عَسَّا
لْگِينَا فَرْكْهَا نْسَا
مَا تْبِيعْ الخَاوَا فِالخْفَا
مَا تْشَدْ فِالدَّمْ دِيَّة
وَلَّا رْشَاوِي ،،
ارْبَعْ لْوَانْ فِالعْرَبْ
نَجَّتْ اعْلَامْ
يَاكْ عْلَامْ بُوكْ أُو بُويَا
عْلَامْ الجْدُودْ أُو بُو عَمَّارْ
وَاشْ مَاتْ وَلَّا قَتْلُونَا
وَلَّا الصَنْدُوقْ سَدُّوهْ
سَرُّو مْعْاهْ ادَّاهْ أُو دَفْنُونَا
و بِارْبَعْ لْوَانْ
غَطُّوهْ أُو مَا سَتٍرُونَا
عْلَاشْ الفُرْقَة وَ العَارْ
نْدِيرْهُمْ اخْمَارْ
يَاكْ الشْمَاغْ لِيكْ
وَ لْدِيكْ الوْلِيَّة
اللِّي فَارْقَتْ اوْلَادْهَا
وَ انْعَاتْهُمْ اصْغَارْ
وَ لْكُلْ الأَحْرَارْ
أَسْرَى وَلَّا شُهَادَا
عَاشُو وَلَّا مَاتُو رْجَالْ
يْجِي العِيدْ
وَ نَتْجَمْعُوا فِصْلَاتُو
انَّجُّو مَنْ سْدَاهُمْ
كْفَنْ يْرُدْ المْلَاحَقْ
وَقْتْ الشُّومْ عْلِينَا إِزَارْ
بْلَا ازْرَارْ ،،
ارْبَعْ لْوَانْ ،،
فِالعْرَبْ طَلْگَت وْشَامْ
مَنْ كَثْرَةْ الظَِلْمَة
ثَاقَتْ فِالعْثَامْ غْرَامْ
اسْكَتْنَا وْ سَكْنَتْنَا فِالعْظَامْ
ارْبَعْ لْوَانَاتْ عَزْبَاتْ
مَا خَانُو مَا بْقَاوْ بَايْرَاتْ
وَلَّا وَحْدَة فِيهُمْ زَاغَتْ
وَلَّا گَالُو فْلِيلْنَا هَرْبَاتْ
وَلَّا فِالحْصِيدَة
فْيُومْ حَصْلَاتْ
وَلَّا مَْعَ لِيهُودِي تَگْلاتْ ،،
زجلية : ارْبَعْ لْوَانْ ،،
فِالعْرَبْ طَلْگَتْ وْشَامْ
بقلم الزجال حكيم البورشدي
تعليق