غَنُّو ٢
الوَاوْ
غِيرْ حَرْفْ أُو مَدْ ادَّلَاوْ
تْجَمْعُو بْزُوجْ
اتْسَمْعُو غَوْثَة وْرَا العْجَبْ
بْدَا ابْنَادَمْ يَنْدَبْ
گَالُو وَاوْوْوْوْ
تْعَاهْدُو فِالسَّرْ
ادَّاوْ الخْزِينْ أُو امْشَاوْ
الوَاوْ
غِيرْ حَرْفْ أُو مَدْ
شَرْطُو احْنَاكْ العَبْدْ
وَگْفُو لْ الحَاكَمْ كِالعْمَدْ
مَا حَلْفُو مَا خَانُو عَهْدْ
الوَاوْ احْلَاوَتْهَا فِالمَدْ
اتَّقْرَا وَا
وَ الوَا كِ الطِّيرْ
إِلَى دْوَى
نَاسْ شَافْتُو نْسَرْ
أُو نَاسْ تْعَيَّطْ وَ تْڭَُولْ هُوَ
رَاهْ رَاهْ هَا هُوَ
طَارْ فْسِيفْةْ عَوَّا
احْرَگْ ارْضْ
وْ شَمِّينَا بْخُورُو فِالهْوَا
يَمْكَنْ غَشُّو فِالدْوَا
يَمَكَنْ مَا بْقَا يَسْوَى
يمكن غِيرْ رِيحْتُو هُو
الوَاوْ حَرْفْ
حَطْ بِينْ زُوجْ كَلْمَاتْ
رَبْطُو بِيهْ الجَّايَّاتْ
الوَاوْ زْيَادَة فِالحْمَاقْ
أُو ضَرْبَة فْرَاسْ الرَّاگَدْ
حْتَى رَمَّشْ فِيهْ الفْيَاقْ
الوَاوْ وَاوْ
حَارُو فِيهْ الفُقْهَا
حَنَّتْ الشْيُوخْ
أُو مَا قْرَاوْهْ الطُّلْبَة
شَافْ الكَتْبَة وَ لْصَقْهَا
يَلْعَبْ بِينْ زُوجْ
أُو يْوَلَّدْ العَزْبَة فِالدْرُوجْ
الوَاوْ احْنَا
تْشَبَّهْنَا بِالنْعَامَة
الرَّاسْ فِالرْمَلْ وَ الذَّاتْ
تْعَيَّطْ وَا مُولَانَا
الوَا احْنَشْ تْلَوَّى فِالكَرْشْ
بَاشْ يَخْرُجْ شَمُّوهْ الڭُرْشْ
وَ الڭَُرْشْ نُقْرَة قْدِيمَة
اتْصَقْلَاتْ بِالغَشْ
حْتَى بَانَتْ النَيَّة مَلْسَة
وَ الوْجَهْ احْرَشْ
گُولُو اعْلَاشْ
سَوْلُو غَنُّو
غَدَّا إِلَى مَا كَدْبَاتْشْ
الوَاوْ
غَنُّو / الزجال حكيم البورشدي
تعليق