يقولون القصيد لشاعرٍ يحكي معاناته !!
وانا أقول القصيد اللي كتبت أكبر من طعوني
ويقولون الغرام اوهام قلبٍ زمّ نزواته
وانا أقول الغرام طعون وانتم لا تحدوني
أقول إنه سما الدنيا .. واقول إنه مسافاته
واقول إنه .. واقول إني .. ولو مرّه تشوفوني
أحس إني على كثر الغرام وكثر لوعاته
وحيدٍ ما معاي إلا أنا والكل من دوني
واحس إني على كثر القصيد وطول مضماته
كتبت ولا طلبت اللي يمروني .. يمروني
صباح الخير والذكرى وعشقٍ ما لقى ذاته
صباح الشوق أنا جيت وجفاك مغيرٍ لوني
يغيب القلب عن صدري وانا ما قلت لك هاته
دريت إنه معك وامسيت أرد الشوف لعيوني
عسى ماهن معك ياللي تطول العذر زلاته
وعسى ما للجفا عذرٍ تطوله وانت مضنوني
ترى ماهو خطاي إليا عطيت الحب مشهاته
وترى ماهو خطاه إليا كتبت ولا قريتوني
رفعت عيون مداتي عن حجّان هقواته
وقلت إن كان ماخاب الوفا ما خابت ظنوني
أنا .. ما هو غرور اللي يهاب الحب شرهاته
أنا .. ما هو غرور اللي حبست الدمع بجفوني
وأنا .. ما هو قصور اللي سكت وارتاح لسكاته
وانا ما هو قصور إليا ذكرت اللي تناسوني
يلوم .. ولا يلوم إلا عيون قلوب شمّاته
وانا قد قلتها .. مالي ومال اللي يلوموني