مختاره جديده.. ومعزوفه من معزوفات الرائع (منادي)..
انتقيتها لأهديها الى حبيبي الغالي..
مع تحياتي واشواقي الحاره لك..


أبد والله..سمعت بطاري عيونك,وجيت اغليك...
يقول القلب: سلملي عليه ويطلب وصالك.
حبيبي..وش تقول بعاشق قصة غرامه فيك...
نسى الدنيا ومن فيها وجا ينشدعن احوالك
حبيبي..جيت لمصافح مواعيد الفرح بيديك...
وجيت اعطي يمينك حب ماتدريبه شمالك.
اشوفك واسمعك قبل اعرفك واشتاقلك وابيك...
واحس آمال عمري من عرفتك تشبه آمالك.
انا ماعشت فبل اعيش بإحساسك وقبل اجيك...
حبيبي ..جيتك بقلبي ولو ماجيتلك جالك!!
احاسيسي كريمه وانت تستاهل كرم غاليك...
ترى لو مااشرقت شمسك وصل رحت اتبع ظلالك.
يقولون العرب" دار بلا مغليك ماتغريك "...
واقول انك بليا حب ... كنك عايش لحالك.
انا لاجيت اسولف عن شعوري قمت اسولف فيك..
وانا ادري رغم كل هالشوق مامريت في بالك.
ان الغلا مثل القدر يرضيك لو يبكيك..
ولاينفعك بعلوم الغلا ..عمك ولا خالك.
مابين الحلم والواقع يصيبك حظي ويخطيك...
متى تصبح نصيب اللي وقف بأماله قبالك.
ولاتزعل من اللي لازعل منك رجع يرضيك...
ولاتطري كلام البعد ...فال الله ولا فالك.
انا لو ماتذكرتك غلا..جاب الغلا طاريك...
تعيش وتسلم لقلبٍ على كف الغلا شالك.
اطالع وجهك المشرق أمل ...وعيوني تناديك...
واقول الله ثم الله..."لايحرمني وصالك".

مع تحياتي,,