شافها وبعيونها باقي دموع

........................ نـظـره حزينه بيّنت بعيونها

تمشي تثاقل رجلها ماهو خضوع

....................... مير الحزن حملٍ تشيله متونها

قال الخطا يابنت ماعنّه رجوع

........................ أخطيت والدنيا سـوادٍٍ لونها

يابنت هالدنيا طفت فيها الشموع

........................ وحالي ضعيفه شايفه وشلونها

قامت تهامل بالدمع شيٍّ يروع

....................... تبكي عـلى فرقى حبيب عيونها

طال السكوت وحدّبن ذيك الضلوع

...................... الله يعين البنت جـن جـنونهـا

ثم وقفت تحكي تسابقها الدموع

................... قالت له ليه نفسي تزيد إحزونها

ليه تنوي الفرقا وهي شيٍّ يلوع

....................... بيدك حياتي وإنت تغلا دونها

قال الخطا لا صار ماعنّه رجوع

..................... هذي المصيبه مافي حلٍّ دونها

قالت توكّل وإنت مابين الضلوع

.................... ساكن وماتنسى الجفون عيونها

شمسي أنا غابت وما تنوي الطلوع

...................... وياحظ ليلى في غلا مجنونها

وســــــــــلامــــــــــتـــــــــكـــــــم
1417هـ
جلال الخالدي