الغضب يجتاح القرية .. الكل يضرب الكف بالكف . فلم يعد هناك كلام سوى الكلام عن محمد سليمان وما فعله ..

_ كله من محمد سيمان .. من ساعة ما ابوه مات وورث وهو بيبعتر فى الورث شمال ويمين .
_ باع ال50 فدان اللى ع الطريق ومحلات العطارة والبيت الكبير حتى البيت بتاعه باعه وقاعد فيه بالايجار .

بعد صلاة الظهر وقف الكثير من المارة والمصلين امام الجامع يحملقون فى تلك اللافتة الموضوعة على باب الجامع والتى كتب عليها ..

( المسجد للبيع " 450 متر " المخابرة محمد سليمان تليفون ... )

على بعد امتار من الجامع كان محمد سليمان خارجا من منزله .. تجمهر حوله الكثير من المارة يعاتبوه على ما فعله ..
_ بقى يا واحد عشان عايز فلوس تقوم تبيع الجامع اللى ابوك بناه خير لوجه الله ..
_ اعمل ايه ؟؟ عايز فلوس ..
ثم تركهم واستكمل سيره حتى توقف مرة اخرى وقال لهم :
_ طب مادمتم عايزين الجامع ماتشتروه واهو انتم اولى من اى غريب ييجى يهده ويبنى مكانه عمارة ..

بعد ان انتهى من كلماته .. شيئا فشيئا تفرق الجمع والبعض يقول لنفسه
_ بقى انا لما احط فلوسى احطها ف جامع ..
_ ما انا لما اجى ابنى مكانه حاجه الناس هتعمل فيا زى ما عملت فى محمد سليمان ..

والبعض الاخر _ فقط _ يضرب الكف بالكف ويلعن محمد سليمان واولاد هذا الزمان بل ويلعن الزمان نفسه ..