بالبلدي الفصيح ( يا مرور يا بلديه يا مسئولين )
يا مرور يا بلدية يا مسؤولين
خرجت من الجريدة بعدما انتهى الدوام ولسه أبغى افتح باب السيارة إلا وألاقي واحد كافشني من رقبتي وقلي.. وأخيراً كفشتك يبو فتو ما صدقت ولقيتك ما حتركك إلا لما تشوفلي حل في المصيبة اللي انا فيها.. طيب يا سيدي سيب رقبتي قبل ما تنخلع في يدك ول عليك هادي يد والا زرادية.. المهم رد عليا وقال لازم دحين تجي معايا تشوف المصيبة اللي انا فيها واللي بهدلتني وبهدلت السكان اللي ساكنين معانا.. يا سيدي خليها بعدين بعد صلاة العشاء انا دوبني خارج من الجريدة ابغى اروح اتغذى وانسدح شوية وبعدين نشوف موضوعك.. ما حتتحرك شبر الا ورجلي على رجلك دحين تجي معايا وان كان على الغدا اللي بتتحجج به انا مستعد اغديك واعشيك.. يعني ده آخر كلام عندك.. ما في مراعاة.. المهم ركبت سيارة اخينا وما وقفنا الا عند الاستاد الرياضي.. قولتله دحين انت جايبني هنا هوه في مباراة دحين والا ايه.. مباراة ايه انت التاني دحين انا ابغى اعرف انت ايش شايف قدامك.. شايف سكة وشوارع وعماير يا كترها في هذا الحي.. بس هوه ده اللي قدرت تشوفه منت شايف الشاحنات الكتيره اللي واقفه في كل مكان هادي سبب مصيبتنا هادي الشاحنات يبو فتو من سنتين وهيه جايبه لنا الهم قلبوا الحي سكن ونوم وطبيخ حتى الشبابيك حق بيوتنا ما نقدر نفتحها من كتر الروائح الكريهة اللي بتجي منهم لما بيقضوا حاجاتهم هدا غير الاسفلت اللي سوتوا الحكومة دهملوه وهربدوه وكسروه من كتر ما تمشي شاحناتهم عليه حتى لما تبغى تخرج الصباح تودي اولادك ما تقدر تتحرك من كتر الشاحنات الكتيرة اللي مقفلة مدخل الشارع.. طيب خلاص روق المنقا انا اروح اتفاهم معاهم وان شاء الله يصير خير ورحت على مجموعة كانوا جالسين يطقوا حنك وقلتلهم بعدما ردوا السلام ممكن يا جماعة تشوفوا مكان غير ده المكان عشان توقفوا شاحناتكم لانه دا المكان من عشرين سنة كان مواقف لكم لكن دحين خلاص الحي كله سكان وعماير وشوارع تجارية فيا ريت تشيلو عفشكم من هنا ولسه ما غلقت كلامي وعينك ما تشوف الا النور وقفوا اتنين منهم كأنهم ما شاء الله عماره دورين وملحق طوال وعراض ردوا عليا بلهجتهم والشرر طاير من عيونهم (شو بدك هو نحنا كاعدين جنب بيتك والا واقفين على راصك).
وانسحبت حبه حبه لا يروحوا يفرموني رجعت لأخينا وقولتله خلاص انا اتفاهمت معاهم ووعدوني انهم حيمشوا من هنا.. فرح الراجل وانبسط ورجعني تاني لسيارتي وقلي وهوه ماشي ترى بكره الغدا على حسابي ركبت سيارتي وجيت راجع للبيت وقلت بيني وبين نفسي ياريت الحبايب اللي في المرور والبلدية يقروا ده الكلام مرة واتنين وتلاته عشان يشوفوا حل لهادي المشكلة اللي بيعاني منها سكان هدا الحي وحنشوف شمس تطلع خبر يبان.. وكل عام وانتو بخير وصحة وسلامة واشوفكم على خير.. في امان الله.
تعليق