مرحبا >>>> بتشوفو من هالضروس وايد

الحقيقة هذا الموضوع مهدى إلى مصرقع واللي يظن إنه إذا انحاش لهنا سوف يهرب من مصالتي بس وين


تدرون البليزر موب ذاك الموتر بالطعس (ثقيل موب زي الباترول ولا اللاندكروزر)وانا بالأصل ما عندي زود خبرة بالتطعيس (ولذلك لقبوني بالطعس ) وطبعا بليزري خربان ما بوه دبل (زين إنه يشتغل). المهم ذاك اليوم وانا بالدوام إلا يزهم علي ولد خالتي ويقول عازمك عالغدى، أنا مباشرة شكيت في الموضوع (صرلي شهور ما سمعت صوته والحين غدا مرة وحدة؟ لا وبيدفع هو ) أنا طبعا سالت سعابيلي وسقت الأودية والشعاب (أحسن جملة في غصب واحد، نحتريها من العام للعام ) وسيرت عليه وقاطعن الأمل إني ألاقيه بالمطعم (ظنيت إنه محتر ولا به نزلة شعبية (على سيرة الشعاب) لكن الله خيب ظني ولا هو قاعدن بالمطعم يحتريني ومعاه ذاك الأشيقر الأحيمر، إثره جايبن معاه خواجة من العمل. ونقعد نسولف: هاو آر يو؟بخير الله مير يسلمتس (مشت على الخواجة ما انتبهلها ) وشوي ولا الغدا والم ويجي ذاك الأطخم اللي لابس بدلة بغيت أقوم أحب كتفه بس ولد خالتي مسكني وقلي إهجد لا بارك الله فيك وانا قل له سم طال عمرك (معاه خواجة وبيدفع حق الغدا ) المهم ونخلص غدا حوالي الأربعة وتدرون الرياض كيف الساعةأربعة، بردد مرررررررررة، يوم خلصنا يجيني النوم كان أقوم وأقول لولد عمي أكرمك الله وللخواجة هابي شانس وهاردلك (لغاااات ) وجيت بمشي ولا قريبي ممسكني مع خشتي ويقول وين انت ووجهك؟ (يوم قال كذه أنا صرت خفت يطلبني قطة في الغدا) بس أشوا كان يكمل ويقول: تهقاني عازمك فرحان بشوفتك يالمخفة؟ جب بليزرك الأثري ذا ترانا طالعين الثمامة نطعس. هو يوم قال كذه، أنا قلت أكيد محتر وبغيت أتصل بحقين شهار . أجل بليزري أنا يطعس بوه؟ مخبل إنت؟ (قويت عيني بعد الغدا ) قال ما عليك. هذا الخواجة جاي الرياض أسبوع ويبغى يشوف الصحرى خلنا نوديه هنك نغبر عليه شوي ونرجعه (كان وديناه منتدى النكت، كل غبار الرياض في ذاك ). المهم يالربع سرينا الثمامة وجينا حق الحفرة ولا فيه شوية شباب (أثر فيه مخبلين غيرنا) وانا صراحة تفاجأت يعني الساعة 4.5 والعرق أربع أربع (طبعا ما عندي مكيف ولا ادري وشهو له). نزلنا في ذاك نناظر الجيوب ولا الأمريكي اللي معنا يناظرلي ويقول: لتس قو طعس. أنا يوم يقول كذا ما كان غير أمسك الليور وبغيت ألخه وأنا أصرخ به كالهيزوم الشجاع: الطعس اللي جابته أمك! بس الله ستر وولد خالتي يمسكني ويحجز بيناتنا. أنا استغربت كيف عرف النكنيم حقي؟ ما حد يناديني طعس غير الشلة، معقول السي آي إيه قد كذه متطورة؟ عاد بديت أوجس منه خيفة ذا الخواجه وقلت له: تبي نخش الرمل إن يور هيد (براسك) وكان أنزل وانسم الكفرات ونتجهز كي نطب بحر الرمال العظيم.



ملاحظة: وقفت استخدام الضروس وغيرها نظراً لأن كل ما سويت اضافة يعصي