اموت واعرف شنو سالفة اللي يشتري دلاغ واحد مشهور في مزاد علني ولا الاندر وير ولا جوني صار له اربع سنين يلبسه وانقطع شنو الحلو في هالموضوع ماادري وشنو هذى الهواية اللي بعض المليونيرية عندهم هوس فيها هم ماادري ومع ان فيه فقراء يجونهم ويطلبون منهم الف دولار مايعطونهم بينما لو دروا ان المنديل مال شارون ستون اللي ماسحه فيه مكياجها يبي ينباع تلقاهم يركضون ركض عليه بس علشان يشتروته تقول شاري منجم ذهب مو منديل فيه ماسكره واحمر شفايف شارون ستون وطبعا مثل هالغرائب كثير مثل صورة شهادة بول مكارتن اللي تم بيعها يخمسين الف دولار شدعوه يبا تعالوا اعطيكم شهادة ميلادي الاصلية بالف دينار واروح ثاني يوم اطلع بدل فاقد طبعا ماتدرون شكثر ضحكت على هذا اللي اسمه باشرحبيل اللي سلطوا الاضواء عليه على انه اشتري منديل ونظارة ام كلثوم بخمس ملايين دولار في حفل خيري سوته محطة فضائية وطلع بالاخير باشرحبيل اسم وهمي احد طرطنقي متصل يبي يستانس ويضحك على العالم باشرحبيل شرحبنا تشرحب وخلا القناة مشرحبه تشرحب وما تدري شنو تسوي المحطة المسكينة مثل هؤلاء الاغنياء الصجيين مو الجذبيين ياكثرهم وياكثر هذولي المخابيل اللي يدفعون على شباصة بريجيت باردو مليون دولار الله يهداهم !!