اضحك لين تفطس
( نظرات استغراب من الجميع )
- هه !!!!!! ما تعرفوني ؟
اللي جيتكم ذاك اليوم ابي اشتري في الاسهم ...
قال مدير البنك: ايه ... طيب روح لمحمد
- ( أنا ) يا محمد يا محمد يا محمد . قمت اصايح في البنك لين جاني محمد
- ( الموظف ) نعم أي خدمة ؟
- ( أنا ) أي خدمة!!! انا اللي جيتكم ذاك اليوم اباشتري في الاسهم .
- ( الموظف ) تفضل حياك الله .
- ( أنا ) الله يغنيك والله اني معزوم .
- ( الموظف ) لا ... اقول تفضل اجلس
- ( أنا ) ايه .... طيب
- ( الموظف ) خلاص كل أوراقك جاهزه ... وبامكانك تشتري
- أشتري ؟؟ وش أشتري ؟
- أسهم .
- ايييه .. اجل وانا اخوك ودي تفزع لي
- ابشر آمر
- ما يامر عليك عدو ... وش أشري ؟
- انت شوف وقرر.
- والله ما اعرف .. لكن شف لي اسهم زينه واصليه ولا تنعفط .
- يضحك
- تكفا وانا اخوك
- حاضر ، وين تبغى فيه ؟
- ؟؟؟؟
- الكهربا ؟ مضمونه وحليوه
- لا!!!! الكرهب ؟؟؟ ما لقيت الا هذي ؟ كل يوم طافيه والا خربان العداد والا الاسلاك متلامسه .. لا وازيدك من الشعر بيت ، يحطون الفاتورة في العداد ، ويجون الورعان ويسرقونها ، والا يدعسونها من تحت الباب ويجيها الهوا ويطيرها ، وبعدين والله لو اني شريت منهم ثم طفا الكرهب عندنا والله ان يجوني اهل الديرة ويظربوني .... لا والله .
- يضحك من كل قلبه . ثم يقول : أجل الاتصالات ؟
- عسى مهيب حقت التلفون ؟
- الا هي .
- لآلآلآلآلآ هذولا كذوبين ويزودون الفواتيرويغلون الاسعار وبعدين اقرب اعلمك ( وأقترب من الموظف حتى كدت أن أبتلع أذنه ) يقولون ذي بتصك ... بيجي وحدة جديدة زينة تحاكي القمر ورخيصة ، والناس بيروحون للجديدة وبيخلون ذي لين تخرب مكاينهم وما يلقون من يشتري منهم.
- يضحك بصوت عالي جدا وبطنه يهتز من كثرة الضحك ، ثم يقول .... بعد تفكير :
- وش رايك بسابك ؟
- قلت : سابك؟ حقت الحديد ؟
- قال : ايه
- قلت : اصبر شوي ، ثم أخرجت الجوال واتصلت بسالم ( ولد اختي )
- يا سالم : مسيك بالخير
- يرد سالم
- قلت : وانا خالك وش رايك اشري اسهم من حديدكم
- يبدأ سالم يحدثني عن قواعد المضاربة في الأسهم ، وأصول البيع ، والمؤشر ، والتجميع ، والتصريف ، والتركيع ، وجني الأرباح ، والتدوير الثابت والمتحرك ونقاط الدعم والمقاومة، وكل ماله وما ليس له علاقة ......
- وأخذ نصف ساعة وهو يحكي ....... وانا ما فهمت منه لو حرف .
- ثم قلت : اقول اعقب .... اعقب بس ، وصكيت السماعة .
- ثم قلت للمدير سالم ذا عنز ظايعه ، لكن دبرني انت ...
- يضحك بصوت عالي ويقول والله حيرتني ... وش رايك في المواشي ؟
- وش المواشي ؟
- شركة ترتكز تجارتها في الأغنام والمواشي ..
- الغنم ... الغنم ... الغنم ...( أقول ذلك وأنا أفكر بعمق )
- مهيب شينة ....... ، حليوة ، اقرب اقرب ، وترانا بعد حول رمضان وضحية وبتغلا الغنم .
- هاه ؟ نتوكل على الله ونشري ؟
- توكل على الله .
وللقصة بقية ..
تعليق