خذ اللي تطلبه مادمت اخوي العازم الجزام
لكن ان شفت دمعي شف لنا شي يسلينا
فتى أحلام هنا كان يتغزل في فتاة احلام
خطفها بين حور البحر واغلاها من المينا
وجاب لها بساط الرياح .. قالت للغلا قدام
ولا نحتاج يا مخلوق مخلوقٍ يوصينا
انا ذاك الفتى الصب وهي اجزل واكرم الاكرام
من اللي مد عمره صدق فـ اولنا وتالينا
دقيقة من دقائق هالمكان تسوى مية عام
هنا ساعاتنا ما كانت تلحق ثوانينا
هنا ياما تعاهدنا هنا ياما غدينا اخصام
هنا ياما تعاتبنا .. هنا ياما ترضينا
هنا كنا نصيح وتحتوى صيحاتنا الانسام
لطيفه كنها لامن تجادلنا تهدينا
هنا كان الحمام يطير لكن لاوصلنا حام
يحسب أنا من السرب وهو اللي كان ناسينا
هنا طلنا حضن نجد وهواء الطايف وتمر الشام
وجوز الهند واعذب دجله وسكر قصب سينا
ما أرقه من مكان الله يوم انا نجيه هيام
عطاشي جايعين وكان يطعمنا ويسقينا
نجيه بلا هدايا والخفايا حسبة الايتام
ونعود بلا خفايا والهدايا في مخابينا
ولو ينطق تفجر به نهر كله ذهب وانغام
وزم الفل والريحان والنرجس حوالينا
نحبه كثر ما طشنا وقسمنا فضاه اقسام
لاماسينا واسامينا وامانينا واغانينا
كثر ما ضمنا وايامنا ماهي من الايام
ودنيانا شبر في شبرتضحك ايادينا
علي وضح النقا .. وضح النقا .. وضح النقا اللي دام
وكن الكون باللي فيه ما والله يعنينا
توادعنا وودعنا المكان وحارت الاقدام
ولاملت شفاه افواهنا ترديد اسامينا
ايلين الدمع طاح وطاح معه الشال والبسام
ياليتك تدرى بذيك الدقايق ويش حصل فينا
ورى دمعتك سالت .. وانت اخوي العازم الجزام
انا ما قلت لك دور لنا شي يسلينا

ناصر القحطاني