تفضّــل إكشـف المستور وافضـح خافي احزاني

أنا مـا عــاد يعنيني يبين الجرح أو يخفى !

تمـنـيّـت الفرح مـرّه بـدرب العمر يلقـاني

وتمـنيت اننا ليـلـه بزفـرات اللـقـا نـدفى !

حبيبي وانت بالفرقا غرست السُهد باجفاني

تخيّل وش بقى نحـصـد إلى من الفـرح أقفى !!

احــبــك . . كـثر تمزيق الطعون لقلبي الواني

وكـثـر مـا قد تمنيت السنين لخافقي ترفا

أحـبـك . . مـا بقى عـندي كلامٍ غــيـرها ثاني

احـبـك كلـمـةٍ توصل برغم الجرح والمنفى !

رسمتك امسي ويومي . . سرى حبك بشرياني

وهبتك كل احاسيسي وصرت من الوفا أوفى

واذا قلـبـك بعد هــذا نســاني . . أو تناسـاني

ترى ما عـاد يعنيني . . يلين القلب أو يجفا

أنا البحــار وعــيـونك مـلاذي . . بـس حرماني

وقف مابين رغبات السفين ولهفة المرفا

شعر / سيلمان السناني