الكلمات القادمة لا تحتاج إلى تعليق ولا شاعرها يحتاج إلى مقدمات أنقلها لكم كما قرأتها مع تغيير في العنوان فقط ....
أتمنى تعجبكم ولو إني ما أضمن هالشيء بالنسبة للبريق !!!!!

شاعرٍ تلّ القوافي في طواريقه … وغنّا
ناشدٍ عنّي … تراني من عرب شبه الجزيره
يا سلام الله سلام الطيب … والطيب إيتثنّا
يا قصيدي … وانت راع الأولّه قبل الأخيره
يوم ساقتني هجوسي ياولد … منّا … ومنّا
قلت أرد الشان للرحمن … وادعي بالستيره
ما تكبدت الخساير … من وطنا … في وطنا
باخصٍ طيري … ومن له بالقنص يبخص بطيره
والله انا … ما طففنا الكيل … يوم انا وزنّا
ولا ذخرنا جاهلٍ كالوا … بلا صاعٍ شعيره
ما تعودت الحق أطلب … للخوي إلا تمنّا
دام لي وجهٍ يمون … وكل نشمي يستعيره
علّم اللي طاح … ما بين المغيره … والمثنّا
إن سلم سيف المثنّا … ما سلم سيف المغيره
يحسب إنه يلحق منيره … وهو يلحق مهنا
الخبل يلحق مهنا … يحسب مهنا … منيره !!!
كان ظنه ما وصلنا … علّموه … انا وصلنا
ما يموت من الظما مطوي رشا غبّه … لبيره
والغبينه … لا على النذر مثله … ما غبنّا
كل حَبٍ له رحاه … وكل سيفٍ له جفيره
من حجا والا حميره … ما علينا ما اشتحنّا
دام حدينا فرسنا من حجا … والا حميره
إن بغانا بالمراجل ينشد القالات … عنّا
ويدري إنا لا انتخانا البزر … قمنا له عشيره
ما ذخرنا الا الحميّا … والوفا … وسلوم أهلنا
يوم ولد اللاش … يذخر قلّ له الشيمه ذخيره
واكبر أهل الدار … لو ما وصل حدّ الشيب سنّا
شايبٍ لا اعمومست الأريا … نجيه ونستشيره
وان بغاها بالشعر … حنّا هلك يالشعر … حنّا
إن قصدنا نستبيحه … وان سكتنا … نستثيره
يا جملنا … ما جهلك الزير سالم … يا جملنا
ايهبا داحس على الغبرا … على سالم وزيره
قد وسمتك وسم جدي … لا غفلت ولا جهلنا
وكل مطنوخٍ يوّسم وسم جدانه … بميره
والهنوف اللي زهت بكفوفها نقشات حنّا
روّحت بقلوب بعض الناس … من ديره لديره
وافضحت وجنة سميره … خوّة اللي ممتحنا
بايع الخوّه … بحبة خال … في وجنة سميره
صاحبي … لو تاخذك في اللاش شرهة حسن ظنّا
عدّها … شرهة ضميرٍ حيّ في ميت ضميره
صاحبي … ما كلّ وردٍ يعجبك شكله … يجنّا
ولا خبرت أعمى بصيره … جا يقود أعمى بصيره
والدحيمي … يوم تلّ القوافي … هيجن به وغنّا
يا سلام الله على ربعي … عرب شبه الجزيره

محمد الدحيمي