تراها الصوره اللي جا عليها في الوداع علوم
فديتك ما سواها حرّك الخفاق … واوجاعـه
عسى يا احلى هدايا الكون من انتب من حلال القوم
عسى يمي يجيبك من تركتك عنده … وداعـه
معاك أضيع ياعمري … وابي لو ساعةٍ من يوم
تضيّعها معي … وانسى وش اليوم وكم الساعه
عشيرك من يد الترك ..ليد الفرس .. ليدين الروم
هذا هو يعربيٍ … لا نسى حلمك ولا باعــه
تعال الكل ينشد عنك وطيور الخيال … تحوم
وانا من بين طيف .. وصوره ودفتر .. وسمّاعـه
من أول ما اصبح أستفرد بنكهة سرك … المكتوم
واهيم بكل شارع واندهك … واخرج عن الطاعه
أطارد شمسك اللي لآخر الدنيا … بدون غيـوم
وإلى مني ذكرت عيونك ومغناي … وشراعـه
أجي جنب البحر واحكي له أول ما عرفت العوم
وفوق الشاطي أرسم وجهك اللي سافر شعاعه
والى جا الموج يمي ضمّت إيدي وجهك المرسوم
وطاحت دمعتينٍ مرّت الخدين … مرتاعــه
واعوّد للحدايق ما بقى من زادي إلا اللـوم
أفتش عن عبيرٍ كمّ .. وكم نسمه من اتباعه
أداعب وردها والفلّ والريحان واليشمــوم
ولا هو ملمس الورد الحقيقي يا اجمل أنواعه
وانشد عنك أناشيد وعصافير وشجر وكروم
وكرسي باهتٍ لونه … وسبع خيوط لمّاعه
واشوفك في فساتينٍ ذهب ومعلّقٍ منظــوم
واخبّر بك سرايا كل سوق … وغالي بضاعه
واشيل أوراقك أم حروف وقلوبٍ تشيل سهوم
واغني ما طرى واطبع عليها الطاري طباعـه
واعوّد للوساده … في مسا ماله قمر ونجوم
واصحّي صورتك من نومها … وتفزّ فزّاعه
أنام بحضنها لين الصباح يقول … صح النوم
وافيق بوجهٍ أجمل من صباح الخير مطلاعه