وسط جدة شافت العين فتان
حرام ماشافت عيوني مثيله
الخد وردي طالعٍ وسط بستان
والعين كن فيها سيوفٍ صقيله
الوسط طاقه من قماشات بقشان
والله من شافه بينهد حيله
ومبسم حمر يشبه لخاتم سليمان
ورموش ياستار سودا ضليله
من يوم شفته شب في القلب نيران
ودي بوصله بس مافيه حيله
قربت منه وقلت بالخير يافلان
ورحب بي المجهول وافي الجديله
وارخى اللثام وقال لي انت غلطان
ولا انت باول من يضيع دليله
انا في جدة من زمانين سكان
وانت اجنبي مادري من اية قبيله
قلت الغلط مرجوع ماكان شن كان
وهلت دموع العين مثل المخيله
وبدأ السؤال وقال وش فيك زعلان
حالتك حالة شخص فارق خليله
تبغى الصراحة انا يازين الى الان
جاهل بدرب الحب ياشين جيله
خوفي من الله انكان في قلبك ايمان
واعطفي على روح من اجلك عليله
قال انت باين فيك عاشق وتعبان
وراعي الهوى معروف حاله نحيله
ومادمت في حبي مولع وغرقان
ملزوم انا ارضالك باية وسيله
قلت الله يخليك معروفك بان
اديت لي الواجب وعلومك دليله
ارويت قلبٍ منك يازين عطشان
وفي الناس اشكالك ومثلك قليله




الدمعه الحزينه...