[poet font="Simplified Arabic,4,crimson,normal,normal" bkcolor="" bkimage="" border="none,2,gray" type=2 line=350% align=right use=ex char="" num="0,black"]
النسا .. روح المسا .. والليل لو فكر يبات .. كان مافيه أغنيات .. وكان ماله ذكريات

كان مافينا عظيم .. وما لأمانينا حليف .. وما بنا قلبٍ وليف .. ولا لنا قصدٍ شريف

النسا نصف الحياة .. إلا النسا كل الحياة .. آه يا اسرار الخوات .. آه يا أحلام البنات

آه يا الطيش الطفولي .. آه الحزن الشفيف .. آه يا العشق العفيف .. آه يا الجنس اللطيف

علمن حتى المرايا والشبابيك اللغات .. والرسايل والدواة .. صارت أعذب مفردات

كم بكن وانكف مبصر .. واضحكن وابصر كفيف .. ورمشن واهتز سيف .. واهمسن وامتد ريف

كم غدن لأخوانهن عزوة صناديدٍ عصاة .. بين صفق المرهفات .. وبين ضبح العاديات

طاحت أشناب وكراسي وانطلق دمع ونزيف .. واعتلى الخف المنيف .. والمقابر تستضيف

النسا ضلع ٍ عوج لولاه كل العدل مات .. ما لهن عنا فوات .. ولا لنا عنهن غناة

تبرق الدنيا على ايديهن ويغرين القنيف .. نطمع بتكريم ضيف .. وناقف بيومٍ عصيف

النسا موج ٍ على بحره منايا وامنيات .. والنسا مركب نجاة .. نسأل الله الثبات

هن لباس .. وهن فراش .. وهن معاش .. وهن رغيف .. ان فتك جوع ٍ مخيف .. وانحدر رجال حيف

النسا حتى شراب الجنه العذب الفرات .. تحت موطى الأمهات .. يا لهن من مكرمات

كل ما عود من الكد اقبل ابن آدم ضعيف .. له ورا البيبان طيف .. مثل نسناس الخريف

في بلادي يحسبون ان النسا متخلفات .. في المسا مستوطنات .. وفي الضحى مستعمرات

ما دروا عن هالبيارق شمخ العرض النظيف .. فزعة الدين الحنيف .. شجرة العز الكثيف

غاده .. وسجاده .. وكفين وحجاب وصلاة .. من صبايا محصنات .. من عروق ٍ طيبات

أطهر من الفين منظر كلها فتنه وزيف .. في رجا الصبح الكسيف .. واجرة الليل السخيف

كم مكان ٍ يعرض اعراضه نساء وسيدات .. والهوى له بايعات .. والغلاف وله فتات

والحسن تشبير عنق وطول ٍ وخصر ٍ نحيف .. وشي ما ينشاف شيف .. لاجل الأول والوصيف

شهبٍ تشابه رسوم الشاشه المتحركات .. ما لزمتهن طراة ولا لهن ملح وحلاة

لا ربيع ٍ فيه خير .. ولابه الا بروق صيف .. والشتا ما به رفيف .. يحيي أوراق الخريف

لي مناحل لي خلايا كلها سكر نبات .. لي حصون ٍ ناعمات .. لي غصون ٍ شامخات

لي قوارير ٍ ملاها العقل والدم الخفيف .. خلفها العمر الكليف .. ودونها الحد الرهيف

يا زمن ويش جاب حلوى غلفوها بالعباة .. جنب حلوى .. للمشاة .. وللغبار .. وللشتات

شف بدل ما هي لواحد صارت لجمع ٍ لفيف .. كيف أنا اخبرك كيف .. شوفها .. فوق الرصيف

رائعة الشاعر الرائع / ناصر القحطاني


[/poet]