[poet font="Simplified Arabic,6,crimson,normal,normal" bkcolor="" bkimage="" border="none,2,gray" type=3 line=200% align=center use=sp char="" num="0,black"]
مثل المحبين ظلمي يسبق انصافي
والظالم إن ما انظلم ما قرّ بذنوبه
ضيعت عمري مع حرفي ومحرافي
نديم حرفي ومجنونه … ومحسوبه
شاعر خيالي … نذرت سنيني لقافي
عمري قصايد على الأيام مكتوبه
رجلٍ بصدره مدينة حب … وسنافي
ما ضاق صدره سوى من كثرة قلوبه
أستر قصور الزمن باحساسي الضافي
واغضي بمنظاري الوردي عن عيوبه
واكذب على جودي المزعوم باسرافي
ياحسرة اللّي يجود وتبخل جيوبه !!
قلبي بصدري جمع جرحي … وسيّافي
ما جاه طالب غرام وردّ مطلوبه
من يوم طعته تبدّل عدلي اجحافي
ترحالي الفوضوي ما تغفره توبه
لا اهتز رمشٍ على بحر الكحل ضافي
عاف المواني وعنَّى مركبه صوبه
سافر بي البحر … حتى غيّر أوصافي
واقنعني أشرب مرارة ملحه … عذوبه
تركت حضن الجنوب المورق الدافي
واخترت برد الشمال وقسوة هبوبه
أستاهل البرد أنا اللّي ضيّع لحافي
وامسيت لا نارٍ … ولا حضن محبوبه
أبيع رمل السنين لهبّـةَ السافي
واركض عبث من شمال الحب لجنوبه
أركض أدوّر ما بين هالعالم انصافي
لي ألف نصفٍ تكمّله ألف … رعبوبه
عدّوا وعمري تعدّاني … بميقافي
من ضحك للبيض لو حبوه … ضحكوا به

[/poet]