[poet font="Simplified Arabic,5,crimson,normal,normal" bkcolor="" bkimage="" border="none,2,gray" type=0 line=200% align=center use=ex char="" num="0,black"]
أنا والليل والعبره وجرح وخاطرٍ مكسور
ونفسٍ من هجير البُعد والحرمان مقهوره
وقلبٍ ظامي لشوفك ولا يروي ظماه بحور
وعينٍ تحتري لحظة غياب الطيف وحضوره
ونـارٍ تنطفي مرّه … ومرّه تشتعل وتثور
واقول النار مقدوره وهي ما هيب مقدوره
حسبت الليل بغيابك .. يمرّن الليال دهور
وكني شايل بقلبي ليـال الوقت وشهوره
تصبّرت وتقدّرت وبنيت من الخيال قصور
إلين ان الجفـا شدّ الركايب وانتهى دوره
تحريتك على درب القصايد من ثلاث شهور
وحشا ما مات لك غصنٍ يشّف الماي بجذوره
تخيرت الغرام وجيت لا راضي ولا مجبور
وجيتي تسبقين خطاك .. مرضيه ومجبوره
وانا ما كان لي رغبه أبيّن واكشف المستور
ولكنّ الجمال أكبر من الخفّاق وشعوره
جمال وود وعيون ودلال وكبرياء شعور
وفتنه تخذل عيون النهار .. وينطفي نوره
ولك في خافقي صوره تلاشت بين ضي ونور
واخاف أسكت من الفرحه وتنطق باسمك الصوره
عرفتك وانتهت رحلة قساوة دربي المهجور
وألا يا جملة أيام الجفا والصد .. مشكوره
خذتني للجفا عِزّه .. واخذني للعناد غـرور
واخاف أكون بعنادي حبيب ومات بغروره
واذا كانت مسافـات الخيانه للغرام قبور
وش اللي يجبر العاشق يخون ويحفر قبوره ؟
وش اللي يجبر الشاعر يدوّر للشعر جمهور ؟
مدام انتي .. محبينه .. وعشاقه .. وجمهوره

[/poet]