لاتشتكي حظك للناس اذا مال من شكوتك للناس ماتحصل غير الفشيلة
الناس اهل هرج ومرج وقيل مع القال يخلونك علك المجالس وسهرتهم كل ليله
اللي يتشمت واللي يعيب واللي يضحك من هبال واللي يطق زفرات يدري بحظك عديله
ايامنا تدور في كل الاحوال نشرب زلال الزين ونكره بديله
مير الطمع في القلب نزال كل يرى نفسه ماحد مثيله
يطمع بصحه وقوه ووجاهه مع المال هو البطل هو الصنديد ماحد نزيله
هو العالم المشهور هو مخرج اجيال هو سليل المجد بو ذراع الطويله
ماحد حقر نفسه لو كان زبال كل يرز خشمه ويومي بشليله
تغتر بنصبته غتره مع عقال واذا تكلم عرفت نفسه هبيله
لوبشروه بالبنت يحتج يبي عيال يحتج على ربه يالله الدخيله
واللي عنده عيال يصرخ يبي مال مايقنع برزقه واللي يجي له
ناس تشتكي من زكام وصداع وسعال ماشافوا اللي على سرير الموت منهد حيله
واللي يتذمر ماعنده غير مليون ريال ماشاف ناس ماعندها تاكل بليله
الله خلقنا شعوب وقبايل وانسال فينا من يحط قدره وفينا من يشيله
ترى عزة التفس ماتعادل بمقدار عز نفسك لاتخلي نفسك ذليله
خلك طلق الوجه سمح وحلحال دايم تبسم لاتشيل هموم ثقيله
ماجاب الزمن اليوم تراه رحال ليله تنوح الوقت وليله جميله
عش وقتك الحاضر مع راحة البال ماراح مايرجع ومافي اليدين حيله
لاتشتكي حظك للناس اذا مال من شكوتك للناس ماتحصل غير الفشيلة
لو الصبر يخاوي الحظ والفال كان الفرج يفتح ابواب مستحيله