السلام عليكم و رحمة الله و بركاته 
عوض أبو فقايا العجمي : شاعر كويتي معروف و مشارك بشاعر المليون 2 . عضو في منتديات النداوي الشعبية .
جيت لك ضامي بعز الصيف هل تسقين ضامي=ضامي لوخان فيه الوقت ما خوّن بجاره
وجيت في عز الشتا في ليلة برد وظلامي=اوقد حروفي قصيد وكل حرف شب ناره
تختلف عندي معايير الزمن شرق وشامي=لاني اطلق من عباد الله ولا ابحث عن الاثاره
جيت تجري بي رياح الشوق لو الموت امامي=واحد لاماك والا بيعته عمره شعاره
قاطعتني واستدارت قبل لا اكمل كلامي=بري حااالي ماذبحني غير ذيك الاستداره
قالت انت اشفيك تبدا بالحكي قبل السلامي=ودي ادري هو عدم تركيز والا انها شطاره
قلت سميها زلل بلسان يابنت الكرامي=قولي انه خانه التعبير في نطق العباره
والهوى يا بنت لو يعرف عزيزين المقامي=مالفى الضامي على بابك ولا طال انتظاره
ولا نشف ريقي على الميراد وعروقي حيامي=رغم مابك من عفاف وما بقلبي من طهاره
قالت المح فيك حزن له شهور وله عوامي=قلت ما للخاطر المكسور ياكود الجباره
اسمعيني لا عدمت اللي ورى ذاك اللثامي=الحزن فيني ويدفعني على كسب الصداره
اعشق ان العشق يضنيني ويحرمني منامي=واعشق اني ليتصدرت اتصدر عن جداره
واهتوي في البر بره والغزير الالتطامي=ابدوي (ن) يعشق اهل الباديه واهل الحضاره
واتحمل وان بغيت اقوم شالتني عضامي=وان بغيت اطيب طبت ولا خذيت الطيب عاره
واحتمل عوجا رفيقي واكرمه فرخ السنامي=الدهر باير وابن عمي وقاري من وقاره
وعشرة عيال الحمايل من على صدري وسامي=المجرب قال معرفة الرجال اكبر تجاره
حسبي الله يوم حدني العطش والطير حامي=لين قمت اسوق بغيابك على شوفك بشاره
اشهد ان العين تضما للربيع وتستهامي=مثل ما تضما على غيث المراويح الزباره
ومثل راع الصنف ليصكه على كيفه اضرامي=كل مادقت هجوسه شب في خشم الزقاره
قالت اصبر فعل ربعي مروية حد الحسامي=ويش بتسوي ليا شنوا عليك الصبح غاره
قلت لعيونك وانا ميت عطش والا هيامي=عاشق ومناه ياخذ يومه امن اول نهاره
عاشق ليهام هام بصدق وليا شام شامي=بس في لاماك ما اصلي صلاة الاستخاره
انظري للوضع واسبابه بعين الاهتمامي=وارفقي باللي غدا مابين عشقه واحتضاره
ان قبلتي جيت اغني ياسلامي ياسلامي=والوفا ياخذ خفوقي من يمينه لي يساره
وان وقف حظي مهو من طبعي اعظ الابهامي=اشري لي باصبعك والحر تكفيه الاشاره
خافقي يشبع ويشلع شلعة الحر القطامي=ليتعلا من بعد ما ينتثر ريش الحباره
واقبلي مني تحياتي وشوقي واحترامي=وعذر منهو ساق حاله وارخصه قبل اعتذاره
صابني ما صابني لا تلحقيني بالملامي=مثل ماصاب (المطوع يوم شاف خدود ساره)
تعليق