قصيدة بعنوان .. ضفاف المنفه



نــعم واللي خلقني يا احمرار الوردتين الســود
ذكــرتك لين ما صقت سعاد بوجهها بــــــابي
ذكرتك لين صــار الكحل برقٍ ينثني ورعــــــود
ولا ادري كان للدنيا زوايا ترفــــــــض غيـــابي
كتبتك لين ما طاح الورق من لينّـــات العـــود
أضمه عّلْ لي صـــــدرٍ يشيله داخل كتـــــابي
كفى يا جبهة الورد .. العقيق .. الكستنا والعود
ضفاف المنفــه .. الملقي على عتقان اكوابـــــي
أبــي لا مرني شق الجفون انك تجيه .. تعــــود
وابي لا زلـزلت أرض المروج اتطيح بأعصـابـــي
انا يا سيدي مدري الحـنين الــلي بكى لي زود
او انه هالنفاق اللي كسرنى لأجل احبـــابــــي
اشوفك كل هالدنيا طريــقٍ.. ضـيـقٍ .. مسـدود
يشن بفرقعة حرب الجهات العسـر بثيــابـــي
تخـّيرت الفراق وهمــــهمات العــالم المفقـــود
لقيت اني انا نفس القبيح .. الشاهر انيــــابي
كرهته وللنخيل أول .. وثاني ..وآخر العنقــود
وانا في حلمي المسود شفتك وجهي الصــــابي
ذكرتك كان لي آخر هــزيمة حبلـــــي المشدود
قطعته وليّته ايد الجروح تعانق .. (( اوصابي ))
حبيبي للوجوه اشباه وللـــــقيا زمن ووعـــود
وانا في مقبل آهات انتظار المجفـــي اسبــابي
نعم واللي خلقني يا زمان الغـــايب الموجـــود
تمنيت انْ تدور الأرض واشوفــك طارقٍ بابــي



فيصل بن سعيد بن ابراهيم العلوي