بأكتب لأبوي اللي على الهم صبّار

قصيدةٍ تحكي خفايا شعوري

يابوي أنا تايه وضايع ومحتار

وماني على كثر المصايب صبوري

ملّيت من همّي وحظّي والأقدار

ومن الحياة اللي تزايد بجوري

والله ماني حاسد ولاني غدّار

ولاني من اللي حاملين الشروري

ولاني من اللي ناقلينٍ للأخبار

ولاني من اللي عابرين الجسوري

ولاني من اللي بايحينٍ بالأسرار

ولاني من اللي يسرقون التجوري

ولاني مرافق رفقةٍ نِجس وأشرار

ولاني مخاوي صاحب يعيب شوري

ولاني بجاحد صاحبٍ عزّني وصار

بين العرب وحده يطّل ويزوري

ولاني مضيّع ديني بسكر وقمار

ولاني من اللي يفعلون الفجوري

ولاني بعابد غير ستّار غفّار

وماذل أبد إلا لربٍ غفوري

ولاني مزعّل والديني وبالنار

منهو يزعّلهم ويعقّ ويجوري

ولاني من اللي لأهلهم جابوا العار

ولاني من اللي مهمّلين الأموري

وأنا عقب ماقلت للحين محتار

ليه مازرعت بأمسي اليوم يبوري

ليه البلا أشوفه على مد الأنظار

وليه البلا لاجاني موجع وفوري

ملّيت ولالي دبره ولاني صبّار

كفاني ماجاني وهذا شعوري

وســلامتكم..

جلال الخالدي