ملاحظة : كُـتب الموضوع باللهجة العامية الدارجة في بعض مناطق السعودية..
.
يا شباب ممكن كلمة راس
ممكن اكون غشيم و ما افهم كثير في امور الحياة لكن يا شباب ترا ثلاثة ارباع عيال السعودية رايحين فيها من ناحية تعاملهم من أخواتهم .
( لن أتحدث من منطلق الدين )
لذلك حط الصلافة و الجلافة و الدلاخة بكيس و ارمها برا
لاني احسن منك و لا انت احسن مني
شوف افهم اسمع فتح مسام عقلك و فكر في اللي ابقوله لك
فيه حاجتين مهمة و مشتركة عند اغلب البنات ، ليست بالاكل و الشرب و الفساتين و الذهب و .......الخ
( طفش /زهق/ ملل )
و
( الـــعــاطفة )
قرأت هذه الحاجتين بشكل جيد و استوعبتهما
هذه الحاجتين تحتاج الى ( معاملة او تعامل ) خاص من الاخ الى أخته .
لأنك تقدر تحط شماغك على كتفك و تضرب الباب كل ما حسيت بالملل ، إما مع ابو مقحص اللي مسلفك خمسين ريال قبل اسبوع و تشوفه ملك و خوي و تحطة على يمناك و تقعد تلفلف انت و اياه بالسيارة او تروح للاستراحه مع خوياك تدقها بلوت و لا سوني للفجر و لا كورة في العصرية كل يوم و لا على النت 24 ساعه و لا كشتة و تخييم و لا سفر ........
ما احد قال لك لا تتسلى ، لكن يا أخي
أختك اللي دمها يجرى بعروقك و دمك يجري بعروقها ، ما فكرت فيها ، بالله عليك لو اخذت خواتك كل يومين انت بنفسك و رحت مشيتهم في حديقة و لا بر و لا مطعم أو في أي مكان يمكن للواحد انه يتمشى فيه ..
تشوف أن فيها شيء او تنقص من رجولتك ؟
و على فكره مو تقعد تنافخ عليها و مصعر جبهتك كانك ابن عباد اللي كان مع الزير سالم
يا اخي اعتبر اختك مثل خويك ابو مقحص اللي كل ما شفته شقت الابتسامة وجهك
، سولف معها و اضحك معها ، حسسها أنها اكثر من اخت بالنسبة لك ، يا اخي تنازل شوي عن كم ساعة تقضيها بالتماشي و اجلس مع خواتك
ابتسم لهم و سولف معهم سوالف تخليهم يستناسون
اسمع كلامهم باهتمام ، و لا تخلي بلوفك تنقز من الزعل اذا ما اعجبك شيء من خواتك و تقفل السوالف بعرض اكتافك
صحح الخطا بابتسامة و بهدوء ، تقول ما اقدر اقولك تعود و لازم تتعود .
و بعدين لا تسوى فيها جاسوس و تفترض فيهن سوء النية
خل القاعده التالية لباس عقلك و نفسك ( أنا أثق في أخواتي و لكن لا أثق في الغرباء )
و اذا اكرمهن الله بتمشية خارج البيت بقيادتك الرشيده ، ما اقول خلك افدغ ، اقول خلك ذيب ، حطهم بعيونك و حط اصابعك بعيون الدلوخ اللي اذا شافوا طرف شيله مقطوعه و طايحة بالشارع ، نزل من السيارة و قعد يطالع فيها تقول انه اكتشف نيزك طايح .
خواتك حشيمات لكن عيون الدلوخ يتحكم فيها القيح ، و تراهم واجدين و في كل مكان فلا تخليهم سبب أنك ما تطلع خواتك .
معليش و انا اخوك تحملني شوي حتى لو كنت غلطان اكيد راح تستفيد من غلطي .
شوف انت الاشياء المسلية و المفيده و الزينة و اللي راح يحبونها خواتك و تبعد عنهن الــ ( طفش /زهق/ ملل ) .
و تعال شوي خلنا نتكلم عن ( الـــعــاطفة ) ،
الاشباع العاطفي لا تفكر انه غزل و تغزل
الاب اذا ضم بنته ضمه ابو حاني على بنته ، هذا نوع مهم من انواع الاشباع العاطفة عند البنات
لذلك خواتك يحتاجون منك كلام مهذب و زين ، مثلا شفتها ترسم رسمه ، امدحها ، مشاء الله وش هالابداع ...الخ
شفتها لبست فستان جديد ، اذكر الله قدامها بصوت مسموع ( طبعا مع ابتسامه الله يسعدك )
وش هالزين الله يحفظك يا وخيتي من كل عين ، عز الله ان اللي بتزوجكِ مو امه داعيته و بس حتى أمم أمه داعيته له ،
طبعا فيه شغلات تراها بسيطه بس معناها كبير ، يعني مثلا كنت برا و ناوي ترجع البيت ، مر البقالة و اشتر لخواتك الاشياء اللي يحبونها جالكسي بطاطس شاني .... الخ ، اشياء بسيطه لكن معناها ( ما انسى خواتي حتى في ابسط الامور )
.
انت مسؤول عن دور مهم في الأسرة ، دورك كأخ امام خواتك او اختك ، امام ابوك و امك و اخوانك أمام نفسك .....
انت باسلوبك و بعقلك و باطلاعك و احساسك بالمسؤولية
راح تخلي الأسرة بأكملها تكون اسرة مُحبة ، تشبع بعضها بعض عاطفيا و نفسيا ...................
عاد سامحني إن غلطت ، و يمكن ما أرد على هالموضوع لأنه موضوع متعب و يحتاج منك شخصيا أنك تتعب فيه
.
.
تنوية : الأخوات الإناث لا تأخذن الموضوع فرصة للضرب
ساعدن كل أخ و لا تساعدن عليه .
.
..
.
.
مودتي
.
ساري نهار
7/6/2010 م
تعليق