السلام عليكم
هذه قصه كومديه رائعة جدا قراتها و اعجبتني و اتوقع ان تعجبكم
وهى من الكاتب همس الغروب من منتدى حواء و اليكم القصه



اعزائي القراء اهديكم هذا المقال متمنيا ان ينال اعجابكم .. وسامحوني اذا كنت استخدمت اللهجه العاميه لكن هذا بغرض الكوميديا بس ..واذا فيه شي ماعجبكم ياليت تنبهوني عليه .. واتمنى منكم تستشفون الفايده اللي كنت ابيها من ورى هالمقال .. وعلى فكره المقال عباره عن ثلاثيه (يعني ثلاث حلقات)
******************************************
بدر ... ياااااااابدر تعال ياوليدي ابيك بسالفه .
- سـ سـسـ سـ سم يبه.(مسوي فيها محترم انا ووجهي)
- سم الله عدوك ياولدي.. يابدر اسمعني وانا ابوك انت ماشاء الله عليك كبرت وصار عمرك الحين خمسه وعشرين سنه وتخرجت من الجامعه وصار عندك وظيفه والحمد لله ماناقصك شي و.........
- ( بدا قلبي ينغزني من هالاسلوب. الله يستر وش يبي ذا الشايب مني)الله مير يسلمك يايبه كل هذا بفضل الله ثم بفضلك والله لا يحـ..........
- اقول انثبر بس خل اكمل كلامي
- ( طب..طاح وجهي ) سم امر الله يحييك
- وما اظنك تبي تكبر ازود من هالكبر علشان كذا انا قررت انك تتزوج وش قلت؟؟؟؟
- ترررررررررااااا طمبق طمبق طمبق( موسيقى تعبر عن المفاجاءه) أأأأأنا انا اتزوج ؟؟؟!!!!
- ايه انت تتزوج ليه وش ناقصك انت وخشتك . ماشاء الله كبر اللـ........(تك تك تك تك تك) وزندك يمشي عليه الـ.....(تك تك تك تك ماااااااء) وش اللي يمنعك تتزوج ؟؟؟؟
- بـ بـ بس بس بس يايبه
- هاه وش بلاك قمت تبسبس تحتس يامال الحتسه
- بس يايبه انا ميح ( يعني ماعندي سالفه )
- وشلون ميح الله يميح بطنك قل امين .
- يعني انا يبه ماعرف شي بهالسوالف ( يعنني ماعمري غازلت ولا اعرف بالحريم ) وانا ماقد فكرت بالزواج.
- لالالالالالا ماعليك وانا ابوك من هالناحيه تطمن يجي يوم تتعلم فيه . المهم تراي مواعد ابو سليمان اليوم عقب العشاء نمر عليه انا وانت مو بتنسى والا تروح تدشر مع اخوياك وتفشلنا قدام الرجال؟؟ شفني علمتك ترا باتوطا ببطنك .
- طيب ابشر طال عمرك انشاء الله ماراح اتحرك من مكاني الين يجي الموعد


يالله وش ذا الورطه اللي طحنا بها الحين من اللي قال لهم اني ابي اتزوج افففففف والله مو وقته هالسوالف انا فاضي لمره, وبيت, وغثه, ولا تتاخر, ولاتنسى تجيب معك الاغراض ويوم تبي للسوق ويوم تبي للطبيبه انا وين وها المسؤليه وين .

الله اكبر الله اكبر....... هذا الاذان ياذن يالله قرب الموعد وهذا ابوي يناديني بروح اشوف وش يبي .
- يالله يابدر مشينا
- وين ؟؟
- (قام ينتفض الشايب وقعد يدور على شي يصكني فيه براسي ) انا وش كنت اقول لك يالوح ماعلمتك اننا مواعدين ابو سليمان عقب الصلاة
- طيب تو الصلاة ماخلصت .. وليه العجله ؟؟؟
- ( هالمره صكني بجد على وجهي بمخمس يحبه قلبكم) انا ابيك تروح معي للصلاة وتقعد بالصف الاول جنب ابو سليمان الله لايسلمك تراك ذبحتني وجبت لي الصمرقع يالدلخ.... ابيك جنبه علشان يعرف انك تصلي ومانت من اللي تاركين الصلاه ويوافق عليك.. امش قدامي مشت عليك تريله قل امين .

وسحبني مع قفاي وخذاني معه للمسجد ... ولما دخلت للمسجد لقيت مكان بالصف الاول بس بعيد عن ابو سليمان( تخبرون مستحي منه ابو نسب .. صرت امون صح ؟؟؟) وجلست بالمكان .. ولما جت عيني على ابوي الا عيونه حمر وشكله وده يطخني .. وقام ياشر لي بعيونه على ابو سليمان وانا طبعا لبيب افهمها وهي طايره ..قمت من مكاني ورحت جلست عند ابو نسب... المهم خلصت الصلاة وجينا طالعين من المسجد .. ادور على نعالي مالقيتها حسبي الله على حرامية النعال هذولا اللي ماسلمت منهم المساجد.. وانا قاعد ادور الا والمح الوالد مع ابو نسب ويسولفون ويضحكون .. وبعدين تركوا بعض وجاني ابوي يركض ويقول :
- يالله مشينا الرجال يحترينا
- لحظه يبه بس ادور على نعالي
- لاحوووووووول وش اللي بلاني بهالولد الرخمه هذا ... وين راحت نعالك خلصني دورها زين
- مدري يبه بس الظاهر ان احد من البزارين اخذها
- طيب اسمع شف شف ذي النعال البسها وخل نروح يالله
- بس هذولي مو لي يايبه
- ادري انهم مهم لك بس خذهم ويالله
- !!!!!!!! تبيني اسرق واصير سروق اخر عمري يايبه؟؟؟؟
- افففففففف لا حول ولا قوة الا بالله العظيم . صبر جميل والله المستعان . طيب رح انقلع للبيت بسررررررعه البس لك شي وانا انتظرك هنيا بس لاتتاخر والا ذبحتك
- طيب


وطمرت مثل الذيب للبيت ولبست ذيك الجزمه ( الله يكرمكم ) اللي تلق وتلمع جديده كنت شاريها ابيها للعيد بس يالله صارت من نصيب الخطبه ورشيت على روحي قزازة عطر كامله ولبست شماغي الجديد وصرت حلو حلو حلو مرررررره (ههههه تحسون فيه واحد مصدق نفسه ومغتر فيها ) ماعلينا ..المهم ورحت اركض الين ما وصلت بيت ابو نسب ولقيت ابوي واقف عند الباب يحتريني.. وطقينا الباب وفتح لنا ولدهم الصغير صالح ( الله يصلحه) واول ماشافني صار يضحك علي ويقول : الدبه بدر جا .. الدبه بدر جا.. هذا اللي كان يلحق ورانا بالشارع كل مره يلقانا نلعب فيها كوره .. تعالوا شوفوه .. المهم ماني قايل لكم وش قال بعد.. بس ابوي فكني منه وقال له رح طس قل لابوك الرجال عند الباب.. وقام يركض وهو يصيح : يبه يبه الرجال وبدر الدبي عند الباب يبونك..
شوي وجا ابوسليمان يستقبلنا عند الباب وقلطنا للمجلس...
ورحب فينا الرجال وجابوا القهوه والقدوع( صحن تمر) وبداو هالشياب يتساسرون ويتكلمون بينهم ويضحكون وانا قاعد على اعصابي ورجولي تتراجف والعرق يصبصب مني تقول اني ماصوره منكسره , وبدا ابوي بالكلام...
- هذا يابو سليمان الولد بدر ماشاء الله تخرج من المدرسه ( القديم مايدري ان اسمها جامعه) وصار رجال وقلنا نبي نزوجه من شان يركد ويعقل( اقوم اتودس ببطن هالشايب .. ودي بس اعرف من اللي قايل له اني مجنون علشان يبيني اركد) وقلنا عاد مافيه غير ابو سليمان نلقى طلبنا عنده وينتشرف بنسبه
- ايه حياكم الله يابو بدر والبنت بتكم والولد ولدنا وابشرو باللي تبون
قمت قربت من ابوي وسالته هالسؤال:
- يبه ابو سليمان يقول الولد ولدنا والبنت بنتكم ؟؟
- ايه وش فيها ؟؟
- افاااااااااا اجل كل هالسنين تضحكون علي وتقولون اني ولدكم وبالاخير تطلعون متبادلين انت وابو سليمان بالمستشفى وخذيوا بنتكم واعطوني لكم ؟؟؟
- حسبي الله ونعم الوكيل فيك .. الظاهر انت تبي تموتني ناقص عمر ؟؟
- ليه يبه سؤال بريئ مافيه شي
- تبرات منك هدومك قل امين بس.. لعنبوا بليسك الرجال مايقصد اللي انت فهمته يقصد شي ثاني مير ما اقول غير الله يخلف على ام جابتك اسكت بس وانثبر.
واستاذنا ابو سليمان وطلع يقول بيشاور البنت ويرجع لنا ..
وطول ماهو غايب وانا ادعي بقلبي واقول يارب ان هالخبله ماتوافق ونفتك بس يارب انها ماتوافق يااااااااااااارب.. وفجاءه سمعت صوت زغاريد ووناسه وضحك .. معناته البنت وافقت الله يرجها .. طيب طيب بنشوف انا والا هي؟؟
رجع ابو سليمان وهو فاك فمه تقول كبوت سياره وسنونه متراصه تقول طابور بنك ويضحك ويقول مبروك مبروك البنت وافقت (حسبي الله عليها) ورد عليه ابوي الله يبارك فعمرك انشاء الله .. ونغزني مع جنبي يبيني ارد عليه .. وصرت اقول الله يبارك فيه .. مبروك عليكم انا !!!!!! وخزني عقبها بو سليمان بنظره حاااااااقده على الكلمه اللي قلتها لكن ابوي صار يضحك ويقول هههههههه الولد دمه خفيف يابو سليمان تراه يحب ينكت كثير ( ادري انه بقلبه وده يموتني ) لاتاخذ على خاطرك منه(عاش مصرف ) ..
الحين انا ودي بطريقه اني افركش هالزواجه بس ماني عارف وجت براسي فكره قلت اجربها يمكن تزبط معي.. قمت قلت لابوي:
- يبه اساله كم يبي مهر لهالنعجه اللي عطانا اياها ؟؟
- اقول انطم بس خلاص حنا تفاهمنا على كل شي
- طيب يعني كم يبون مهر؟؟
- افففففف منك لازم تعرف؟؟
- اجل م.. مو بنا اللي بدفع لازم اعرف
- طيب يبون مهر ستين الف ريال
- اف اف اف اف اف شدعوه ستين الف ؟؟؟ ليش وانا ماخذ ليدي سبنسر من عندهم ؟؟ لالالالالالالالا غالي مره غالي خله يراعينا شوي( طبعا ارتفع صوتي وسمعنا ابو سليمان)
- وشوا اللي غالي (يقوله ابو سليمان)
- المهر ياعمي
- عمت عينك ليش انت ماتقدر عليه ؟؟
- الا اقدر ونص بس للي يستاهلون ( تلاحظون انه فيه واحد ماعنده اسلوب بالكلام .. اسلوبه طحش)
- وبنتي يعني ماتستاهل؟؟
- اقول لايكثر هرجك مالت عليك وعلى بنتك
- افااااااااااا يابو بدر انت سامع هالخبل وش يقول لي لا وببيتي بعد؟؟
وقام ابوي وانتفض وصفقني بمخمس وسحبني للحوش برا وتودس ببطني شوي وبعدين قال لي شف يالهيس انت انا برجع اتسامح من ابو سليمان واعتذر منه .. واتفق معه وارجع اناديك .. لكن والله العظيم ان فتحت اثمك بكلمه اني غير اذبحك واتبرا منك واحرمك من الميراث( تكفى انت وهالميراث اللي يسمعك يقول انك بتورثني الفيصليه والعقاريه وكم محل ذهب وكم بوت على البحر .. مادروا ان ماوراك الا الفقر ) وش تقول انت؟؟
ابد سلامتك يبه ابشر بسوي اللي تبيه ..
(( في الحلقه القادمه راح نعرف وش صار لما قررت اقابل العروس واشوفها؟؟))

الى اللقاء