1/2
انا اكتب لكم هاللحين معاناتي ومدري هوانااكتب بالكيبورد
ولاالكيبورد يكتبني ..انااشتغل في 902 شركة الأنفصالات السعوديه ..الجوال

في صباح كل يوم مشرق اقوم مصحصح ومبسووووووووووووط واضحك
وفرحاااااااان ،،وافطرواروح للعمل

في طريقي للعمل اسوق سيارتي اللي تحتضنه شوارع الرياض..اللي مافي امل تلقى فيها مطب

اوقف عند اول إشاره واشوف عربجيه((دينه)) محمله عمال !!
واصيح بأعلى صوتي واااااااو يااللله هنووود

ياحليلهم

واقعد اتأمل هالهنود واحس بمشقة الحياة في وجوههم واحس ان
لذة الحياة في مشقتها وتعبها والسعي وراء لقمة
العيش...(تكفى بلاش كذا ياشيخ!!) ..

وبعدماتولع الأشاره خضرا ادوس بنزين بكل هدوء واوقف عند
الأشاره الثانيه واشوف هايلكس اللي يسوقه شايب ومعه
عجوزه وثالثهم تيسهم والشايب مسوي حفريات بخشمه!!

واجلس اتأمل كيف جار الزمان على هذا الشايب الكبير!!!

واسئل نفسي ياولد تتوقع انك بكرى تكون شايب؟؟!!!

لالالالالالا بسم الله علي

الله ياخذني قبل مااوصل ال 60

المهم اوصل للشركه وادخل للقسم

بعد كذا البس السماعه وانتظر اول إتصال في صباح هذا اليوم
المشرق!!!!

ترن ترن ترن ترن

انا:الجوال...طلال ال؟؟!!!.....السلام عليكم

هو:لاهلاولامرحبا انتم يوم انكم تقطعون جوالي
ليييييييه؟؟

انا:يالله صباح خير..اخوي اكيد ماسددت راجع فاتورتك

هو:الله يفتر عظامك بلا الله يفتر عظامك ياقليل الحيا

((مااقدر اهاوشه لأن الخط مراقب))

انا:اخوي عطني رقمك اتأكد من فاتورتك

هو:خوى جنمبك بلى خوى جمبك انت ماتعلمني وش تبي برقمي
ياللي ماتستحي؟؟ بعدين كيف ماتعرف رقمي وانامشتريه منكم
بعشرتلاف الله لايحللكم ولايبيحكم..طوط طوط طوط

........................................

الأتصال الثاني صوت ناعم!!

انا:الجوال..طلال الفلاني...السلام عليكم

هي:مرحباا طلال صباح الخير تراني مدرسه بحي الريان
وعندنا بنات من عائلتكم

انا:اختي لوسمحتي وش بغيتي؟؟

هي:بسم الله الرحمن الرحيم اقول يااآخ وش فيك زعلان؟؟

انا:اسف اختي اناماني زعلان بس عندي اتصالات كثيره

هي: ههههههههه منتب عاقل يارزان مغربي

انا((ميت من الضحك بس مااقدر المكالمه مراقبه)): اوكي
اختي شكرا على اتصالك

طوط طوط طوط

.................................
المكالمه الثالثه ولد فاهم ودمه خفيف

انا:الجوال..طلال الفلاني...السلام عليكم

هو:هلا طلووووو ياعسل باختصار شديد ابي اعمم الجوال انت
عارف الصيف جا ولازم نسافر ولازم نعمم الجوال افرض احد
يبينا منا ولامنا انت عارف

انا:اوكي اخوي معك البطاقه؟؟

هو:يارجال مابينا بطايق اديك الرقم 00000000

انا:اسف اخوي مااقدر اخدمك الا ببطاقه!!

هو:والله ماهقيتها منك ياطلال...خخخخخخخخ ماهقيت ان
البراقع يفتتني خلاص ابفطر واتصل عليك مره ثانيه عشان
الجوال بسم الوالد ولامعي بطاقته خخخخخخ بعدين تعال
لاتخلي خويك ثقيل الدم يرد علي تراني مادانيه بعيشة الله
!!! اسمه عبدالله الله يجعله مجنون

انا:شكرا اخوي على اتصالك

طوط طوط طوط

...............................
ومره كنت مستلم الورديه باخر الليل واتصل علي واحد شكله
كان رايح فيها وتوه صاحي

انا:الجوال ..طلال الفلاني السلام عليم

هو:آآآآآآآآآآآآآآآوووووووووووووه((يتثاوب)) هلا طلال
متى يذن الفجر؟؟

انا :حلوه ذي؟ يابوالشباب متصل على الجوال عشان تسئل
هالسؤال ؟؟

هو:معليش والله مامعي ساعه ولاابي اتصل على ساعة الهاتف
عشان ماتاخذون ربع ريال!!

انا:الساعه 1:30 شكرا على اتصالك اخوي
.........................
ومره كلمني واحد يسئلني عن نتيجة الهلال والنصر ومن فاز
..لأنه كان نايم ولاشاف المباراة!!

والمواقف اللي تصير كثيييييييييييير كثييييييييير
والاحراج اللي يصير من بنات وشباب اكثر واكثر

ولو بنعطي الموضوع ثلاث صفحات ماخلصنا

على فكره ترى القصص كلها صدقيه والله وحاصلتلي شخصيا

بس الحمدلله نقلت من 902


اخوكم
الفلاني
ــــــــــــــــــــ

2/2

انا موظف بشركة الاتصالات ومكلف بمهمة رسمية باحدى مدن الشمال ..
جا شايب داخل علي المكتب ..
خير وشعندك يا بوي ..
قال ابيك تزين لي هالورقة ..
وش ذي الورقة يا بوي ..
قال هذي فيزة الشغالة ابي الغيها ...
وفففففف . يبه هذي فيزة شغالة واحنا شركة الاتصالات مالنا شغل بهالسوالف ..
قالي : انت منت المدير
قلت بلى يا بوي انا المدير
قالي : مدير وما عندك سنع
قلت له يا بوي ..احنا شغلنا تلفونات يبه وبس .. فيز الشغالات بمكتب العمل ..
عطاني مقفاه ومشى


اخوكم
بشار