صراحه كل ماجيت بكتب اتردد اقول خلو غيري يكتب احسن بس اتشجع واقول يالله وش دعوا المراه بتقرى المقاله اصلا هي مايجي في بالها اني في يوم اشتري كمبيوتر صخر واشتغل عليه تبي انتر نت (( ياكبرها عند الله))..المهم ندخل في موضوعنا ولاني وربي مجهز شي بخربط اما القحت ولا ماضرها الجمل (( طيب خلص))..طبعا معروف حنا يا الرياجيل في خارج البيت تشوفنا سباع يوم يقولك الواحد ادن وراك قلت ماتقلب وجهك لاغيره اتجاهه بكف (( لاذي بعد كبيره))) ولا عند موظفينه خاصه لاصار هندي ولا سيلاني (( يحسبون الكف تحية))في مكتبه الخاص تشوفه يشخط ويسب واتلحهم مايسوى عنده جناح بعوضه ..ومن يوصل البيت (( واحد بدت الرجفيه عنده)) يدخل بكل ادب والابتسامه من الشق للشق يقول للمراه وش سويتي فديت خشتك ترد تقول له ماسويت شي بكيت خشتك يرد يقول عادي الله يسلم الهارديز ومطاعم احمد سفر ولا تضايقين فديتك (( انت بتضيقها غصب !!!))) ولا جاها وقال ابغي انوم اذا ماعندك مانع ترد تقوله وانت جاي لفندق يا روح امك (( الله يرحم امها )) يقول لا بس تعرفين جاي من الشغل تعبان وابغا انوم تقوله اقولك انثبر لا جا باليل بدري رح نام (( ايه هين تخلينه ينام بدري))..المهم ولا جا خوينا الحلو هذا وطلع من البيت بدى ينفخ الصدر وبدت علامة المرجلة بالعوده الى قواعدها سالمه من غير خدش اللهم خدوش بسيطه في الكرامه ..المهم ولا يقبل على ربعه في المجلس الا وهو يقول لهم المهم ياشباب ماوصيكم الله الله بالمرجله داخل البيت (( اقول اللطم بس)) لاتصيرون كنكم دجاج عجيج تجفلون من اول خزه (( قل وربي )) لاترى المراه لو شافت الرجال مهزوز اركبته والعنت ابو سلسفيل اهله (( باين من خشتك يا الشين))..خلوكم رياجيل الكلمة كلمتكم والامر امركم (( فاقد المرجله لايعطيه)) شوفوني انا يوم ادخل على البيت واقول للمراه وش طبختي اليوم ترد وهي جافله تقول سم طبخت دجاج اقوم واقول لها بعصبيه ايش ايش ايش عاد هو يناظر ربعه ويقول وش فيكم تناظروني كذا منتو مصدقين لالا شكلكم منتو مصدقين اذا منتو مصدقين اسكت(( لالا كمل عادي فاكين الدرايش)).المهم ويقوم البلاف ويكمل القصة الي يحلم ابها ويقول والي ماتزوج للحين اقوله يحرص ترى اول ليله هي البداية للحياة الاسريه يعني لاتصدقون ان المراه ماتخاف الا لين تذبح قدامها قطو ترى كله كذب (( مسكين ذبح قدامها قطو ذبحت قدامه تيس بربري وشلعت قرونه)).ويكمل صاحبنا ويقول وش فيكم تناظروني منتو مصدقين لالا انتو منتو مصدقين شكلكم منتو مصدقين يردون عليه الشباب يابن الحلال مصدقين كمل (( لام الله من لامك الشي الوحيد الي فيك يثبت انك رجال بطاقة الاحوال)) المهم ويقوم خوينا ويعطيهم النصيحه الي كسرت ظهر الجمل ويقول واذا شفت المراه مانفع معها ضرب ولا شكم على طول هددها بالزواج (( فمك خير جرب قل ذا الحكي لها وربي ان تعلقك من الفانيله العلاق حقتك على شرفت الحوش)) وعاد ربعه مبحلقين عيونهم عند ذا النقطه يقولون ضنك يافلان لو نهددها بالعرس تهجع المراه وتخاف قال ايوا اسئلو مجرب ولا تسئلون طبيب (( محظوظ من سئل الطبيب)) ويقوم ويناظرهم ويقول وش فيكم شكلكم منتو مصدقين لالا انتو منتم مصدقين ويرد عليه واحد ويقول اقولك كمل دام النفس عليك طيبه لا سحبك من فانيلتك العلاق(( واحد ماهوب لاقين اصلان عنده فانيله علاق كلها مقطعه من التعلق)) ويقوم ويكمل ويقول واذا قدرت انكم تجيبون عليها وحده اقدمو ولا يهمكم صدوني انا بعد كم شهر ابغا اسويها ويقوم ويناظر الشباب ويقول وش فيكم كنكم منتم مصدقين لالا انتم منت مصدقين ويقوم واحد فيهم ويروح لم التلفزيون ويشغل برنامج اسمه العلم والحياة ويقومون الشباب ويلتفتون له ويعطون خوينا ظهرهم (( لام الله من لامكم خاصه الي قريب الدريشه)) .ويقوم حبيبنا ويروح لم البيت وتبتدي تختفي علامة المرجله وتشتغل الرجفيه واول م ايدخل البيت ولا ذي مرته تسب في الخدامه ميري وتقولها يا ميري يلعن ابوككي لبو الي جابك (( تقصده هو طبعا)).يقوم هو ويرد عليها ويقول وش فيكي يا عمري .وتقوم وتخزه ذيك الخزه الي طمن وراها راسه .(( الله يذكر جدي بالخير كان لاجا يخز جدتي من الخلفه تصلي المغرب خمس ركعات)) .وتقول له وش تبي خير يقوم فديته منعمه ويقولها لا ابد طال عمرك بس بغيت اعرف وش فيك تقوله انت مالك شغل رح غير ملابسك وتعال انثبر هنا يقولها ابغا انام تقوله لاحق على النوم يالله خلصني لاتزعجني يقولها ابشري ويقوم ويروح يبدل ملابسه ويرجع يدور حفرته .وبعد السهره يروح يحط راسه وينام بعد يوم اغبر ضايعه فيه ملامح المرجله ويقوم الصبح ويناظرها هو في خاطره يقول ظنك من بيدفن الثاني اول (( يارب انا )) وده يقولها صباح الخير يا مدلل (( ذكرني بنبيل اشعيل يقول انه كل صبح يقول لزوجته صباح الخير يا مدلل !!!.وربي يا نبيل لو اني زوجتك اني لاهفك بالاباجورة الي جنب السرير على راسك فوق متنك وشينك قواة عينك )) ..المهم ان خوينا هذي حياته من يصبح لين يمسي ..مره وحده بس باعها وصار رجالقال للمراه حقته وش تسوين لو تزوجت عليك .قالت ليه يا ماما ولا ظنك انت محسوب علي رجال حبيبي انت من ظمن اغراضي يعني انجب ولا عاد تحكي حكي اكبر منك (( صدقتي يا الشينه)) ..طبعا في السالفه الي انا قلتها شي من الواقع ولكن ماهوب بهالصورة (( واحد خايف تضنون فيه شي)) لانه الرجال يضل رجال مهما كانت قوة شخصية المراه وانا صراحه حبيت اصور حياة عايلة ماتبعد عن بيتنا كثير ونسمع اغرب من كذا لكن ماهوب كل شي ينذكر وطبعا لو كل واحد يتبع تعاليم دينا لا وجدتو انه منصف للرجال والمراه على حد السواء لنه ماهوب بالقوة ممكن تاخذ حقك ولا هي بسوء استخدام السلطه الي الطبيعه منحتها لنا .الاعتدال افضل طريقه للتفاهم وخلق جو المحبه والوئام في البيت الي ينعكس بدوره على الاسرة في تثبيت قواعد التربية الصحيحه يا كم كلمة كانت اقوى من حد سيف ويا كم هجر كان اقوى من رفعت ايد الحمد لله دينا ماخلى لنا شي ما وجهنا له حتى في طريقة ترويض المراه وهو هجرها ثلاث ايام ويا كم كان لها وطئها على تغير في المراه وتحسين سلوكها .. .وش فيكم تناظروني كذا منتم مصدقين لالا شكلكم منتم مصدقين ..صراحه عندي الكثير ودي اقوله لكن مابغا اكثر عليكم لن وربي ياهذرتي ماتخلص (( انا اشهد)) تقول كني رادو موناكارلو وناسينه المذيعين شغال وطالعين اجازه ...اتمنى اني ماكون طولت عليكم (( اقول انقلع تراهم بسون لك دلليت ))..)))