1- برج ( البعير )
======= الحالة العاطفيه =======
ميزتك انك ( صبور ) على التهزيء . وتاكل كلام على قلة حياك ووقفتك كل يوم قدام مدرسة البنات مع نهاية الدوام .
======= الحالة الاجتماعيه =====
يا (صبرك )على عزوبيتك . وفوضويتك .. لو تدعي ربك يرزقك ببنت حلال تستر عليك
وتهجدك من اللقافه وزعزعة امن الجيران المتأهلين .
=======الحالة الماديه =======
تصدق انك حلو وشخصيه بالجوال . نصيحه علشان تدوخ البنات كثر من الكلام اللي
ماله داعي قدامهم . وأعط من هالارانب . خلهم يعرفون انك مهم . ولا عليك من الفاتوره . انت قدها وقدود . وما احد ( يصبر ) مثلك .
**************************************************
2- برج ( الوزغه )
======= الحالة العاطفيه =======
على فكره ..انت تلعب ( بذيلك ) اللي يبي له قطع اليومين هذي ومستغل عاطفة
وسذاجة زوجتك ..تذكر ان الخيانه الزوجيه قاتله للمرأه مثل ماهي قاتله للرجل .
======= الحالة الاجتماعيه =====
يخوي عارفين انها رافعه ضغطك ..وانها تعبي راس زوجتك ..بس مهوب كره
فيك ..لكن حب في بنتها ..اضغط على نفسك وتحمل ومهما كان لا تظن بها سوء.
=======الحالة الماديه =======
حبيبي ..لا تكون مخفه وخواف كل ماشافت زوجتك دعايه من طقة ( اتصل الان )
وقالت اشترلي ..تشتري على طول . اركد ..........................وركدها
*************************************************
3- برج ( المجمر )
======= الحالة العاطفيه =======
قف ..حالتك تختلف . جمله ( عادي حنا في عام الفين ) ماتمشي عند قبيلتك
..وحلاة الثوب رقعته منه وفيك .. خلك منها لانها تختلف عنك كليا ولاتقول
احبها . تزوج وحده مب ضروري تكون من ربعك .بس ضروري تكون من طبعك .
======= الحالة الاجتماعيه =====
التواصل زين ..والزيارات مهمه ..ولكن لا ترهق زوجتك بكثره الزيارات
والضيوف ..خصوصا اذا كملوا اربعات وهات يابلوت .....وصراخك
كل عشر دقايق عجلي بالشاهي يامره .
=======الحالة الماديه =======
ماشاء الله عليك كريم وأجودي .. لكن .. الشي اللي يزيد عن حده ينقلب ضده
ترا فيه فرق بين الكرم والتبذير .. ولا عليك من الناس ...ترا مب بينفعونك اذا
سألك ربك يوم القيامه عن ( الثلاثين راس اللي ذبحتها ) ولا احد اكلها .
************************************************
4- برج ( البعبع )
======= الحالة العاطفيه =======
شكلك تخاف جدا من اظهار عواطفك ناحية زوجتك بعد الزواج . تذكر ان
المرأه تحتاج لمن يهتم بها دائما .. ويشعرها باهميتها .
======= الحالة الاجتماعيه =====
لمعلوميتك فقط .ضرب الاطفال وتخويفهم باستمرار ..احد اسباب فشلهم الاجتماعي
..يعني كف يدك جعلها الكسـ.......
=======الحالة الماديه =======
قبل تصرف اي ريال يا اكبر مبذر تذكر ( ان الريال العنابي ..ينفع في اليوم المغبر )
واذا كنت مصمم تصرف دراهمك وتضيعها .....ارسلك رقم حسابي .
***********************************************
5- برج ( البومه )
======= الحالة العاطفيه =======
لا تقول حظك نحس ..تحمد ربك على الاقل انك باقي حي ..ترا اخوها توه ..
حاصل على الحزام الاسود .. خل المسرا آخر الليل والقفز في بيوت الناس كانك قرد .
======= الحالة الاجتماعيه =====
اقول تراك مبسوط بما ان وجهك نحس ..لا احد يجيك ولا تجي احد ..
ولا هم ولا غم ولا جيران ولا قرايب ........................فكه .
=======الحالة الماديه =======
لا . المساله مب علشانك نحس ووجهك يجيب الهم للجميع وانا منهم
مااحد سلفك ..المساله ان اول كانوا يسلفون ويستلفون ..الحين نادرا
تلقا احد يسلف . ( بالمناسبه القا معك سلف 14 ريال حق الغدا )
**************************************************
6- برج ( الفصفص )
======= الحالة العاطفيه =======
ايش معنى هذي البنت بالذات فيه بنات غيرها كثير .....وحده قالت لك مره من
قلبها : لا . ... لا ترجعلها وخل عندك كرامه . والله لزقه من جد.
======= الحالة الاجتماعيه =====
انتبه لتصرفاتك .. يمكن انت ماتقصد حاجه ..بس غيرك يفسرها بالف حاجه
..إبدا بالنظافه ...اذا زرت احد العزوبيه لا تحوس المكان بالفصفص والدخان .
=======الحالة الماديه =======
الاشياء الصغيره هذي اللي تشتريها هي اللي دمرت ميزانيتك .. انت ماتدري ان
الجبل ..يتكون من ذرات صغيره ...والمليون يتكون من هللات .
**************************************************
7- برج القاهره
======= الحالة العاطفيه =======
يجب ان تتحملي اخطاء زوجك ...فاذا لم نتحمل اخطاء حبايبنا واقرب الناس لنا ونسامحهم على اخطائهم ...فمن نتحمل اذا ؟...ومن سنسامح ؟؟
======= الحالة الاجتماعيه =====
من حقك تعيشين في بيت لوحدك مع زوجك ..لكن ظروف زوجك تختلف .
.ولا يمكن يترك امه لوحدها .. لازم تقدرين ظروف زوجك .
=======الحالة الماديه =======
قبل تطلبين من زوجك يشتري لك فستان جديد او يعطيك فلوس تفصلين
فساتين جديده ....اشتري اولا دولاب جديد .
*************************************************
8- برج ( المعلاق )
======= الحالة العاطفيه =======
تتحملين نص الغلط في حالة السكون والبروده بينك وبين زوجك . يقولون اقرب طريق لقلب الرجل بطنه . جربي . ( عليك بالمرقوق ..واذا رفضها ارسليها لي عن طريق المنتدى وطز في زوجك اذا كان باقي زعلان )
======= الحالة الاجتماعيه =====
لا تحطين الشغاله شماعه تعلقين عليها الاخطاء كلها .. وبكل صراحه بما انك
انتي اللي طلبتي شغاله ..يجب ان تتحملي كل اخطائها . غصب عنك .
=======الحالة الماديه =======
اللي اوله شرط آخره نور ..انتي الحين موظفه وعلى وشك زواج . لا تنسين
تتحدثين مع خطيبك من ناحية مصير راتبك من البدايه ...مافيها شي .
*************************************************
9- برج ( الودي والمهراس )
======= الحالة العاطفيه =======
اما انت عليك حب ...خنقت زوجتك ... وشكاك فوق هذا ... من ضمن الاشياء اللي
تقلل هيبة الرجل امام زوجته ...انه يشك فيها وباستمرار .
======= الحالة الاجتماعيه =====
الرجل باخلاقه وصبره ...وليس بالنفخه الكذابه وتنكيد عيشة خلق الله واستغلال منصبه في اموره . اللي انت فيها الحين .
=======الحالة الماديه =======
الدين هم . هم .هم ......وافضل حل للتخلص من هذا الهم .....تسديده وشكلك ماتبي تسدد دينك ( الله يعين كفيلك )
نصيحه ..حاول ما تتأخر عن تسديد دينك . والا صرت بين الودي والمهراس .
*************************************************
10- برج ( الفانوس )
======= الحالة العاطفيه =======
انت تحب . حاجه حلوه وما اختلفنا ..لكن تؤثر فيك عاطفتك بالشكل هذا وتكون على وشك تضيع مستقبلك ...لا ... المفروض مشاعرك تنور لك طريق ..ما تطفيه مره وحده . اهتم بدراستك احسن .
======= الحالة الاجتماعيه =====
انت تحاول تحرق في نفسك علشان تنور لغيرك ...ترا انت موملزوم باصلاح الكون . هد اعصابك ...وارتاح وريح ملائكتك .
=======الحالة الماديه =======
تذكر ..علشان تكسب حاجه لازم تخسر حاجه . او حاجات .
*************************************************
11- برج ( البلايستيشن )
======= الحالة العاطفيه =======
اولادك ماصاروا يفرحون برجعتك من السفر مثل اول .. الا على فكره هم عرفوا اصلا
انك جيت . والا مادروا عنك .
======= الحالة الاجتماعيه =====
بعض الاشياء تكون نقمه وليس نعمه ..من ضمن هذه الاشياء الاجهزه العصريه الحديثه التي ساعدت على زياده المسافات بين الاقارب والجيران .
=======الحالة الماديه =======
بتقابلك ازمه ماليه شديده في العطله ( قديمه )
( الجديد) .. اقض اجازتك في بيتك ...او سافر برا ..برا...بس .
*************************************************
12- برج ( الفضائيات )
======= الحالة العاطفيه =======
عاطفتك بتسبب لك مشاكل كثيره حاول تعيش حياة البدو بين فتره وفتره وابتعد عن الاشياء العصريه وخاصه الدش .
======= الحالة الاجتماعيه =====
هذا الرجل يضايقك كثيرا ؟ ..لا تسبه ولا تشتمه . ادع عليه فقط ان يكون احد ضحايا
الكاميرا الخفيه في القناه الاولى السعوديه . او يكون ضيفا في برنامج على الهواء
في قناة الجزيره القطريه .
والا اقولك بلاش بلاش ...... قول : الله يعطيك على قد نيتك . وبس
=======الحالة الماديه =======
انت بين اختيارين صعبين .. تدفع 2000 ريال او ما يعادلها للاشتراك في هذه
القنوات ( التحفه )
او تدفع ( 10 ) ريال لاخذ الشفره ..............الله يعينك موقفك صعب
تبي الحل .
.
.
انا تعبت خل الشباب يساعدونك ...........



------------------
لو سمحت لا تضحك..انا اتكلم بجد

[هذه الرسالة عدلت بواسطة الامبراطور (عدلت في 16-08-2000).]