السلام عليكم ورحمة الله وبركاته يا جماعة الخير

قط في مرة حاولت تعلب مع الصغار لعبهم ..


هالسالفة جد ممتعة وتريحك راحة ..
وهم الأطفال يحسون أنك مهتم وتشاركهم أوقاتهم السعيدة
مو بس تتفرغ لمعاقبتهم أو توجه لهم محاضرة لما أتعبوا أمهم أو سووا شي غلط

اللعب مع الأطفال فن .. ههههههه لا تتسرع وتقول تتفلسف
جرب .. جربي .. الوقت للحين ما طاف ..

شوفوا نقدر نبتدي من الصفر ... والسلم الطويل بدايته درجة ..
ما يحتاج تقرأ كتب ( للكسالى ) ولا يحتاج تسأل أطباء نفسيين ..

السالفة أبسط بكثير مما تعتقدون ..
تدرون آنه لا عندي شهادة بالطفولة المبكرة ولا عندي خبرة بأي أمور تربوية ..
السالفة وما فيها تجربة .. آنه دخلت بتجارب معاهم وتعلمت حتى بوقت اللعب تتعلم من الطفل أشياء عديدة .. ومو شرط تكون هالأشياء في الذرة بأهميتها .. ممكن تكون من أبسط الأشياء .. بس حضرتك ما عندك علم عنها سابقاً ..

خذ على سبيل المثال لا الحصر ..

على كل اللي مريت فيه وغيره .. إلا أني تعلمت شيئ جديد في جلسة واحدة مع ولد خالي إلي ما يتعدى سنه الخمس سنين ..

( وعلى فكرة من يوعى الطفل على الدنيا .. تواجد الحاسوب بالمنزل يشكل نقطة تحول في شخصيته ونموه العقلي .. وهاذي شيئ أثبتته الدراسات )

المهم نرجع لسالفتنا .. بيوم وصلت بيت ولد خالي.. واكن ولد ابو 5 سنين .. يحاول يشغل الجهاز .. وما يرضى أحد يشغله غيره .. وفي وسط عملية تشغيل الجهاز .. وقبل ما يدخل نظام التشغيل الويندوز ... توقف عن العمل .. وما واصل ..

آنه عادةً إذا صارت معاي .. أقفل الجهاز من التيار الكهربائي .. فقلت أسوي الشغلة له .. لكن ما وعيت إلا وهو ضارب ثلاثة أزرة مع بعض .. فأستجاب الجهاز واصل العمل على أحسن ما يكون .. ودخل الوندوز بكل سهولة ..

آنه طبعاً وجهي صار قد السمسة .. كنت توني بأظهر عضلاتي .. إلا هو ما شاء الله عليه .. ما يحتاج مساعدة ..

آنه طبعاً ما سألته لكن ابوه حس .. ضحك وقال .. تسأل عن كل شي وأي شي يتعلق بالكمبيوتر .. وامها تكون في غاية السعادة لما تسأل وتتعلم بالأوقات إلي يقضونها جدام الجهاز كل نهاية أسبوع .. وهي وتسألها من وقت للثاني .. وتلاقيها محتفظة بالمعلومات كلها ..

مثل ما يتعلم الطفل أشياء معاك ترى هو يعلمك كذلك - بحكم صفاء ذهنه - أشياء وأشياء .. يمكن من سهولتها تغيب عن بالك .. أو حتى ما كنت تعرف عنها أي شي من قبل ..

زبدة القول .. أقضي وقت مع الأطفال.. مو شرط يكونون عيالك لا تتشرط وتقول آنه مو تزوج وما عندي عيال .. في محيط العائلة شوف كم طفل عندك ..

أستغل أي فرصة تلاقيهم وأقترح مجموعة ألعاب .. مو عيب تلعب قيم بوي أو بلي ستيشن أو قيم كيوب معاهم .. ساعة لعبهم خلها فرصة وأضرب عصفورين بحجر .. صدقني بتكسب قلوبهم ..

وفي النهاية ..


أصحاب الخبرة في هالمجال .. ما عندكم سوالف .. أو مواقف .. مع الأطفال صارت تحكون لنا عنها .. لأنه آنه في جعبتي كم حدث .. بس لما تردون بسوالفكم ..

وخلونا نشوف كيف الأطفال خلبوا لب الكبار بعالمهم

اخوكم المحنك