الرد: التوأم و الصفقات الانتخابية !!


ساعتها نبقى نرمي جاسم من فوق الكوبري

الرد: التوأم و الصفقات الانتخابية !!

الرد: التوأم و الصفقات الانتخابية !!

ماشي يا شاعر ارميني زي منتا عاوز , بس ما اعتقد هترمي خالص لان الدوري مش هيخرج من بين الاهلى والزمالك والاسماعلي الى ماشالله . خخخخ

الرد: التوأم و الصفقات الانتخابية !!

يا سلام عليك يا عم جاسم يا مطمن ..
عموما الدوري المصري من حوالي 15 سنة و هو محصور بين الاهلي 8 بطولات و الزمالك 5 و الاسماعيلي 2 ..
و اعتقد ان الاهلي برصيده الضخم من النجوم و الكفاءات الفنية و بقدرته المتواصلة على الحفاظ على الاستقرار الاداري بالاضافة للدعم الجماهيري العظيم .. بالاضافة لمشاكل نادي الزمالك الحالية .. و صغر سن لاعبي فريق الاسماعيلي .. يخلي الاهلي يحجز الدوري المصري اربع سنين لقدام .. بس كل شئ بامر ربنا !
لكن الفريق اللي فعلا هيكون شديد الخطورة على النادي الاهلي .. هو فريق انبي
لان فريق انبي بيتمتع بوفرة من اللاعبين المميزين زي عمرو زكي و مجدي عبد العاطي و حمادة شنح و عبد الحميد حسن و محمد ثابت و ايمن سعيد و عمرو عبده و رضا شحاتة .. بالاضافة لمدير فني شديد الكفاءة هو طه بصري .. بالاضافة لاستقرار اداري رائع نتيجة لتبعية فريق انبي لوزارة البترول ..
مشكلة فريق انبي هي انه نادي غير جماهيري .. و دي اثارها بتقل جدا قصاد مواجته للفرق الكبيرة زي الاهلي و الزمالك و الاسماعيلي .. لأن اللاعيبة بتبقى مشحونة من الاعلام ..
لكن خلال مواجتهم للفرق المتوسطة اللي ليها جماهيرية عالية زي المصري البورسعيدي و الاتحاد السكندري و المنصورة و غزل المحلة .. ما بيبقاش فيه اي نوع من انواع الشحن النفسي لا جماهيري ولا اعلامي !!
علشان كده اغلب النقط المفقودة من انبي الموسم ده و المواسم السابقة كانت قصاد الفرق المتوسطة !!
..
بالنسبة لسؤالك يا جاسم عن امكانية عودة حسام للنادي الاهلي ..
حسام حسن واحد من رموز الكرة في النادي الاهلي بلا جدال .. و اعتقد انه واحد من اهم 3 لاعبين في تاريخ الاهلي لدى الجماهير بعد صالح سليم و محمود الخطيب !!
لكن مشكلة حسام بتتخلص في الاتي :
1- جمهور الاهلي مش نساي .. و يهمه جدا سمعة و مصلحة فريقه قبل اي لاعب
و حسام حسن للاسف ليه وقائع غبية مع جمهور الاهلي بعد انتقاله للزمالك .. كان ابرزها انه رفع الجزمة في وش الجمهور في ماتش ال6-1
بالاضافة ان جمهور الاهلي مش هيسامح حسام على هجومه على الرموز الاهلاوية بعد انتقاله للزمالك و تحديدا هجومه علىالثنائي صالح سليم و ثابت البطل
بالاضافة ان الجمهور حاليا متكيف جدا من اداء عماد متعب اللى اتطور مستواه بسرعة كبيرة جدا و اصبح قادر على استثمار الفرص اللي بتجيله بعد ما حقق في الدور الاول اعلى نسبة من الفرص الضائعة .. و اغلبها كان في حلق الجون !!
بالاضافة برضه ان الجمهور في انتظار عودة احمد بلال لمستواه .. خصوصا ان احمد بلال هو المهاجم المصري الوحيد اللي يقدر اي متابع يقول بالفم المليان ان ده خليفة حسام حسن !!
2- ادارة النادي الاهلي واحدة من اكثر ادارات الاندية في العالم احتراما لتقاليد ناديها و مبادئه و قيمه اللي تم ارسائها من اكتر من 60 سنة ..
الادارة دي هي اللي استغنت عن الثنائي رامي سعيد و احمد صلاح حسني الموسم اللي فات نتيجة لبعض الشبهات السلوكية .. و هي اللي استغنت عن ابراهيم سعيد اللي يعتبر واحد من افضل اللاعبين المصريين فنيا و مهاريا نتيجة لسوء اخلاقه و عدم انضباطه .. و هي اللي وقفت ابراهيم حسن قبل كده بعد قيامه باشارة منافية للاخلاق في مباراة مصر و المغرب .. ووقفت حسام نفسه بعد ما رمى فانلة النادي على الارض بعد طرده في مباراة قديمة جدا من عشر سنين و كانت على ما اتذكر بين الاهلي و المصري ..
علشان كده ما اعتقدش ان الادارة هتسمح برجوع حسام حسن مرة تانية للنادي الاهلي سواء كلاعب او كعضو في الجهاز التدريبي ..
خصوصا ان حسام زي ما قلت لك مش مطلب جماهيري .. بالاضافة لأن الفريق حاليا في افضل حالاته الفنية من سنين و عنده مهاجمين مميزين جدا زي عماد متعب و احمد بلال و اسامة حسني و خالد بيبو .. و مؤخرا تم التعاقد مع مهاجم منتخب الشباب الموزمبيقي ليوناردو .. و فيه مفاوضات جارية لضم مهاجم برازيلي بالاضافة لاحتمال انتقال مهاجم مصري للنادي الاهلي و غالبا هيكون واحد من الخمسة ( احمد عيد عبد الملك ( حرس الحدود) عمرو زكي( انبي) احمد حافظ ( المصري) مصطفى جعفر ( بلدية المحلة) مجدي عبد العاطي(انبي) )
و الخماسي ده - خاصة اول اربعة - بيتميزوا بامكانيات مهارية و بدنية عالية و معدل تهديفي لا بأس به مع مراعاة عدد الفرص اللي بتجيلهم بالاضافة لصغر سنهم !!
علشان كده اعتقد ان رجوع حسام للاهلي ضرب من ضروب الخيال .. خصوصا ان حسام هيصر على سحب ابراهيم معاه للاهلي .. و ابراهيم تحديدا ملوش مكان في ظل طريقة لعب مانويل جوزيه اللي بتعتمد على بركات في الجانب الايمن كدفاع و ساعد هجوم .. و البديل بيكون اسلام الشاطر افضل ظهير ايمن في مصر !!
و الجبهة اليمنى اصلا مكتظة بالعديد من اللاعبين المميزين زي سيد عبد الحفيظ اللي بيعتبر واحد من معبودي الجماهير في النادي الاهلي و انا على رأسهم !! و وائل شيتوس القنبلة اللي اتأخر انفجارها اكتر من اللازم .. بالاضافة لاحمد رضوان المغضوب عليه من الجهاز الفني و الجماهير على الرغم انه ما اخدش فرصته لغاية دلوقتي !!
لكن بما انك سألتني عن التوأم اللي بيلعب حاليا في المصري .. ففيه لاعب في المصري بيسعى وراه النادي الاهلي و النادي الزمالك .. و ان كان الاهلي الاكثر جدية و الاكثر قدرة على التفاوض ..
اللاعب ده هو الافريقي اكوتي مانساه لاعب خط الوسط المدافع ..
الاهلي حاليا مش في احتياج لاكوتي مانساه لوجود اربع لاعيبة مميزين جدا في مركز خط الوسط المدافع ابرزهم محمد شوقي صاحب ارقى اداء في الدوري المصري الموسم ده .. و الموتور حسن مصطفى .. و احمد حسن صاحب القدرات الخاصة في المراوغة و التسديد .. بالاضافة للناشئ حسام عاشور صاحب الاداء الرشيق .. و ممكن يضاف ليهم الثنائي محمود شيكو وان كان محمود شيكو غير مقنع لينا كجمهور على الرغم من تألقه الملفت في المقاولين العرب و في المنتخب الاوليمبي .. وهادي خشبة المصاب حاليا و اصابته هتستمر لنهاية الموسم !!
لكن المشكلة اللي بتواجه الاهلي حاليا .. هي وجود عروض احتراف جادة جدا و خاصة للثنائي محمد شوقي المطلوب في الدوري الانجليزي .. و احمد حسن اللي تقدم نادي جازينتب التركي ( غازي عنتب) بطلب رسمي لضمه لكن الاهلي رفض !
علشان كده اكوتي مانساه هيكون حل متاح للنادي الاهلي في حالة احتراف اي من لاعبي خط الوسط الحاليين ..
و بما ان الشئ بالشئ يذكر .. فاصعب المشاكل اللي بتواجه الاهلي حاليا هي عروض الاحتراف اللي بتنهال على لاعيبته .. و منها عروض عربية لبركات و الشاطر و النحاس و بيبو .. و عروض تركية لخالد بيبو و اسامة حسني و حسن مصطفى و احمد حسن و وائل رياض و جليبرتو .. و عروض احتراف اوروبية لمحمد شوقي و عماد متعب و احمد ابو مسلم .. بالاضافة للعروض المحلية لللاعبين اللي مش بيشاركوا بشكل مستمر في الفريق الاول .. و ابرزهم سيد عبد الحفيظ واحمد رضوان المطلوبين تقريبا في نص فرق الدوري الممتاز !!
الاهلي حاليا حصر اهدافه في الفوز بالبطولة الافريقية القادمة .. خاصة في ظل تواضع مستوى المنافسين التقليدين من الشمال الافريقي ( الزمالك و الترجي و الرجاء ) و ان كانت افريقيا السمراء بتشهد طفرة على مستوى انديتها بعد ما قدرت انها تعوض الرحيل الكبير لابرز نجومها للاندية الاوروبية .. و كان فوز نادي انيمبا النيجيري ببطولة ابطال افريقيا لمرتين متتالين و صعود ناديين من غانا ( هارتس اوف اوك - كوتوكو ) لنهائي بطولة الكونفدرالية جرس انذار للاندية العربية اللي فرضت سيطرتها من خلال الاهلي و الزمالك و شبيبة القبائل و النجم الساحلي والترجي و الرجاء و المقاولون على مقدرات البطولات الافريقية لمدة 15 سنة !!