عاد أنا توني صغيره على هالامور وش حليلي..
بس حبيت اخذ فكره عن أدوات التجميل والتجاعيد والتخسيس وكله ..
مالنا شغله الحين إلا هالمويضيعات
مير الله يسلمكم هبلوا فينا كل يوم كريم كل يوم مصيبة جديده..
وحريمنا وأنا واحده منهن مهبل بس نراكض نبي الزين..
(( والزين زين لو قام من نومه** والشين شين لو كحل عيونه))
عاد هم كل يوم جايبين لنا عجوز معرعره متكرمشه
وبعد عمليات الشد والمط يقولون كله من الكريم
ادهني عشرة أيام وتلاحظي الفرق...
والله أنى ما احبها بس الطفاقه..قلت ليه ما أسوي تجربه على أمي عائشة (( جدتي ))
هي قاضيه قاضيه!!
منتهية يعني لو جربت عليها الكريمات مافيها شئ هي متجعدة وخليني أشوف..
وهي يا بعد قلبي تشتكي من رجيلاتها عندها عرق النساء ودائما تقول رجلي تعورني من مفصل الورك لمن القدم ..
وبعدين فكرت في فكرتي وقلت وراك يا جهير ما تسوينها فرصه..
وفي يوم من الأيام = وحنا جالسين إلا وجايبين عجيز رجيلاتها تقول وجه معمره عمرها ميتين عام؟؟ مكرمش وحالته حاله وإلا منديل ناسينه مع الغسيل بمخباة أبوي...
ومادين ساقها أمام الكاميرا وقالوا شوفوا قبل استخدام الكريم وش كثر التجاعيد وسوف تتخلص منها مع استخدام الكريم تلطموا بس!!!
وقاموا يدهنون على رجلها كريم وقالوا بعد أسبوعين شوفوا الفرق...
وبعد الأسبوعين يطلعون لنا رجل بنت عمرها سبعة عشر عاما...
ويضعون صوره للساقين ساق العجوز وساق بنت السبعة عشر!!
ويقولون مارايكم بهذا الكريم الفعال قبل وبعد جربوا وانتم الحكم...
بصراحة ذهلت رغم أنى ادري انه كذب بس بصراحة يلعبون بعقولنا لعب!! وحنا مع الخيل يا شقرا..
ما علينا ..
بعدين أنا توني صغيره على هالامور J
بس حبيت أؤمن مستقبلي اجرب وأشوف قبل ما اكبر وأروح لمن السوق واشتري الكريم من محل الدعاية عاد تعرفون وش كثرها محلات النصب عندنا ... ونعلبوهم بكم النصابين ...250!!!
واشتريه من مكافئتي ياذي المكافئةJ كل شئ منها اللي يسمعني يقول ثمانية آلاف لكن على الأقل احسن من غيرنا..
الزبده:: الحين تقولون يا كثر زبدتك يا جهير لا تلوموني مزارع الألبان حولنا..
الكريم وشريناه ... باقي الجدة كيف نقنعها بالاستخدام...
اها جتني الفكرة رحت لمها ..
قلت مسيك بالخير يمه ... قالت يالله انك تحيي جهير(( تخيلوا صوت أم حديجان )) قلت بغيت أقلك شئ يمه(( قالت سمي وش عندك يا جهير )) قلت ::
صديقتي تقول طلع كريم جديد مجربته (( ارفع صوتي يادوب تسمع)) جدتها علشان رجيلاتها تعبانه مثلك..
والحمد لله خفت تقول أول ما تقوى تاقف تمشي والحين تطامر(( تركض )) بالحوش..
قالت قلي والله(( قلت ابد من غير حلف ما تصدقيني يعني )) قالت اجل دوك خمسة ريال جيبي لي واحد(( على بالها فازلين أبو غطى ازرق)) قلت أنا أجيبه لك من مكافئتي تحب الفليسات جدتي رجعت الفلوس بمخباتها ما صدقتعلى الله !!! .
.والله واجيب الكريم وكل يوم امسك جدتي وادهن رجلها وهي مستأنسه..ويوم ورى يوم
خلص الشهر...وكانت المفاجئة...
زادت التجاعيد والترهلات مقياسا بالرجل الأخرى..
سار عندها تيبس بالركبه ما عاد تقدر تثنيها
وطلعت كلها شعر... وسمرت...
وكانت تقوم بعكاز الحين عكاز ولازم نسند لها..
لا وعندها أمل تقول بتخف يمكن الكريم أنعش الألم ليقضي عليه..
وكل يوم يمر اتهزاء واتشتم
!!؟؟ من أهلي باني أنا السبب... في سوء حالة أمي عائشة...كل هذا بعد الكريم
كانت قبل الكريم افضل .. لابارك الله فيهم ولافي كريمهم...
همسة ::إذا كانت دعاياتهم صحيحه فلماذا بعد كل فتره يقولون تخلصي من الكريمات الموجودة عندك وقومي باستخدام هذا الجديد
ومو بس الكريمات حتى أجهزة الرياضة إذا طلعوا جديد طلعوا بالأول عيوب الدنيا... وحتى المبيعات عندنا اكثر شئ بالسعودية خاصة ودول الخليج عامه لدرجة إحدى صديقاتي آتت بكريم تقول الأكثر مبيعا في بريطانيا .. وفرحانين البريطانيين لاقين له وكيل في الخليج.. للمخفات!!
والمشتريات الخليجيات مابين كل ثلاث نساء اثنتين يشترونه..
نبي نكون بيض بالقوة وبالدراهم..
هذا غير الصبغات حدثوا ولاحرج واحده سمراء وتصبغ بأصفر
حتى الشعر حت وتساقط الشعر بسبب الصبغات.. وش فيه خلق الله حسن..لا نقول لا تتزينين تزيني زينه بسيطة وهادئة وجمالك في نظافتك وطهارتك..
حقوق الموضوع محفوظة
باسم الجوهرة الشيخ
الاحد 19/11/1424هـ
جريدة المدينة
منقول لكم
</FONT></FONT>
اجمعوا
تعليق