خــوي الـدرب عــمـري مـاخـذاني دونـه الـنسيـان

وأنا يـا أهــل المــلامه مـارغبت العيش وحداني

أبي لي مهـرةٍ مـاعسفت صـغـيـرة وبنت حصــان

ابـــوهـا اللي يـــفـك المــشـكـلة ويـزبّــن الجاني

واخــوهـا لاتـعزوى بـاسـمـها فـزّوا لـها العـربـان

يحق إلها الفخـــر فـي قـــولة آل فـــلان جــداني

أبـيـهـا فـي بـحــر عـشــريــن لازودٍ ولا نقـصان

أبيها اقصـر طويله والوصـوف أشــكال وألواني

أبي الجبهة كما الصبح وكما القـوس أسود الحجّان

أبيها ناعـســــات ونـرجـسـيه ســـــود الاعـيـاني

أبي رمـشٍ كـمـا ريـش يـغـطي الـثـلـج بـالاوجـان

وأبي جـفـن يـشيــــل الرمـش طـربان وكسلاني

أبي خــدٍ كــمـا ورد تــنـمّى فـي طرف بـسـتــان

وأبي خـشـم صـغـيـر ومثل حـد السيف شـامـاني

أبي البسـمـة كمـا الـبـرق وثناياها كـمـا المـرجـان

وشــفـاهـا جـمـرتـيـن وفـمها خـاتـم ســـلـيـمـاني

أبي شـعــر مـثـل ذيــل الفــرس لاطـبّت المـيـدان

أو الـشــلال لا مـن بــات لـيـلـة بـيـن الامــتــاني

أبي جـيـدٍ سـواة إبـريـق فـضــة نــاتـق مـلـيـان

وصـــدر كـــنـه مــــرايــه عـليـه طــلـع رمــاني

أبي ظـهـرٍ كـما الجـدول وقـدٍ مثل غـصـن اللبــان

وخـصـر مـثل مجـدول الاعـنان وجـسـم رويـاني

أبـيـهـا نـابـيـة ردف وبـطــن ضـامــر جوعــان

أبـيـهـا مـدمـجـة سـاق وقـدمـهـا لـســان ثعـبــاني

أبـيها بـنـت عــز مـن رغدهـا يـنـعـم الـفـسـتـان

أبي الـرقــه وأبي الـدقــه لـهـا بـأطــرافـها شــاني

أبي الـمشيه كـما اللي طالع من المعـركـه كـسبـان

وأبـيـهـا تـرش مـع خـطــواتها مـسـكٍ وريـحـاني

أبي صــوتٍ الا مـني سـمـعته كـن فــيـه ألـحــان

يـدغـدغ مـسمعي ويثـيـر كل السـحــر بـأشـجاني

أبيها حب وإخـلاص وهــواجيس وفـرح واحـزان

أبـيـهـا مـثـل مـا دكتـور أهـالي الـعـشـق وصـّاني

أبـيهـا لوحــة مـاصورتـهــا ريـشــة الـفـنــان

أبـيـها جــوهـــرة مــا جــابـهـا قــاصــي ولا داني

أبـيها تـنـتـصرلي مـن زمـــان حـطني نــيـشــان

وتـبـشـــر بـالـغــلا اللي مــا لـفــا بـه واحـدٍ ثـاني

مـهــرهـا قـلب وشــعــر يهـــز القـلب والوجدان

وألـبـسـهـا الـقـصـيــد وتـصـبـح أوزاني وقـيفـاني

أبي اللي فات واللي فات صعب ومن لقى العنوان

يـرد العـلم ولا إني أفـضـل أبـقى أعـيش وحـداني

ناصر القحطاني