البارحه يوم الخلايق نياما
بيحت من كثر البكا كل مكنون
قمت اتوجد وانثر الماء علاما
من موق عيني دمعها كان مخزون
ولي ونة من سمعها ما يناما
كني صويبٍ بين الاضلاع مطعون
والاكما ونة كسير السلاما
خلوه ربعه للمعادين مديون
والا فونة راعبية حماما
غادي ذكرها والقوانيص يرمون
تسمع لها بين الجرايد احطاما
ومن نوحها تدعي المواليف يبكون
مرحوم ياللي مات شهر الصياما
صافي الجبين بليله العيد مدفون
حطواعليه من الخرق ثوب خاما
وقاموا عليه من الترايب يهلون
مرحوم ياللي مامشى بالملاما
جيران بيته راح ما منه يشكون
اخذت انا وياه عشرة اعواما
مامثلهن في كيفة مالها لون
والله كنه ياعرب صرف عاما
وياحيلة الله شغل الايام وشلون
واكبر همومي من بزورٍ يتاما
لا جيتهم قدام وجهي يبكون
وان قلت لاتبكون قالوا علاما
نبكي ويبكي مثلنا كل محزون
قلت السبب تبكون قالوايتاما
قلت اليتيم انا وانتم تسجون
مع البزور وكل جرحٍ يلاما
الا جروح بخاطري مايطيبون
قمت اتوجد عند ربعٍ احشاما
وجوني على فرقا خليلي يعزون
اقلوا تزوج وانس لاما بلاما
ترى العذارى عن بعضهم يسلون
قلت انا اخاف من غاديات الذماما
اللي على ضيم الدهر مايتقون
تزعل عيالي بالنهر والكلاما
وانا تجرعني من المر بصحون
والله لولا هالصغار اليتاما
واخاف عليهم من السكه يضيعون
لاقول كل البيض عقبه حراما
واصبر كما يصبر على الحبس مسجون
عليه مني كل يوم سلاما
عدة حجيج البيت واللي يطوفون
واعداد مانبت النفل والخزاما
على النبي ياللي حضرتوا تصلون



الدمعه الحزينه...