صوتها الغارق بحزنه اغرق الناس والليل
دق ناقوس الغياب وقلت يالله عسى خير

وانكظم غيظ المدينه فصدر ركعه وترتيل
في رجا باكر وباكر مانواها تباشير

صبر..من وين باصبر والوجع يخنق الحيل
وياس امعن فكسري صرت بيده طباشير

والعيون الجريئه تردف السيل بالسيل
كنّ مابه سحايب تنبت ارض ونواوير
آآه والناس حبلى باسئله تنفث الويل
في خفوقٍ لسانه ماقوى أي تعبير

والقهر شكي خذلني صدّق القال والقيل
ليلها شمع واغاني صبح ورد وعصافير

رحمة الله أقوى من تحري المراسيل
دام طول غيابه وش ابي بالتفاسير

غمضي ياجفوني واتركي البن للهيل
علّ دلة غرامي تختلق له معاذير

صوتها الغارق فحزنه اغرق الصبح والليل
وضج صوت المدينه وقلت يالله عسى خير