(ظاهره جديده وغريبه) هل يصبح (القفل) قفل لقلوب المحبين؟ (صور)
نعم انه القفل
على مر الازمنه والعصور الى عصرنا هذا ارتبط اسم القفل بالاشياء الثمينه والنفيسه التي تحفظ داخل الصناديق والخزانات والمتاجر والمحلات التي يوضع عليها قفل لحفظها بعد حفظ الله من السرقه والضياع او العبث بها من قبل المتطفلين, فكانت الاقفال هي الحارس الامين لها رغم زهد ثمنا الذي هو في متناول الجميع سواءً الغني او الفقير, وبسبب رخص قيمتها وتوفرها باشكال وانواع كثيره جدا لايجد فيها احد مايجعله يتأمل ويتوقف عندها للحظات, بل بدأت تتقلص ويقل الاعتماد عليه وصارت تتجه الى عالم النسيان ونكران الجميل بعد ان ظهر البديل عنها في عصر التطور والتكنولوجيا, فقد صارت الخزانات بارقام الكترونيه وسريه, وصارت ابواب المتاجر كهربائيه وهيدرولكيه واختف الصناديق الحديديه منذ زمن بعيد, فاصبح القفل غريب لاقيمه له في هذا الزمان بعد ان كان هو كاتم الاسرار والحارس الامين.
ولكن يبدو انه يأبى ان يكون نسياً منسيا او ان تهان كرامته ويقل قدره بعد ذلك العز والسمعه الرنانه التي وصل صداها الى جميع اصقاع الارض
بل انه قد عقد العزم على ان يعيد امجاده وبكل قوه هذا المره, ولكن بطريق تختلف عن حفظ الاموال والمجوهرات الثمينه, فقد اتبع استراتيجيه ادهى واخبث من ذلك بكثير, وبعيدة المدى ويسعى لها الكبير والصغير ولا تكلفهم شيئ يذكر لكنها تعني لهم الشيئ الكثير بل وتفوق قيمتها المجوهرات والذهب والفضه وكل ماهو ثمين ولاتتم الا بوجود هذا القفل.
فيما يلي سوف اسرد لكم قصه القفل المكافح والمثابر العنيد فربما انكم ستكونون من من يبحث عنه من جديد, بل قد يتعدى الامر الى انكم ستهدونه الى من تحبون حباً جما ويكون له الاثر الجميل في انفسكم اوانه قد يفوق ذلك بمراحل فيما لو اهديتم الى من تحبون ساعه ذهبيه او طقم الماس او طقم ذهب, فاذا تحقق ذلك فهوا لن يكلفكم شيئ ويكون له الاثر الطيب في النفوس.
____________
(نتحول الى اللهجه العاميه) <<<<تعبت
قبل كم يوم كنت اتمشى في احد المدن الاوروبيه من شارع الى شارع ومن محل الى محل وكان الجو جميل وبراااد <<<يقهركم... اسولف مع هذا واسأل ذاك وشوي اشرب قهوه وارجع اكل عسكريم (ايس كريم) <<< مايحس له طعم الا اذا قال عسكريم.... ومره اوقف اتفرج على اللي يشحذون و يسوون حركات اتستعراضيه (طراره راقيه وممتعه في نفس الوقت يعني تدفع بنفس راضيه)... الحلو في الموضوع ان كل واحد في حاله ماحد له دخل في الثاني سو اللي تبي لكن لاتغلط على احد (طبعاً انا يمنعني ديني واخلاقي اني اسوي مثلهم) ... الشعب كله تقريباً يمشي وكل واحد منهم كلبه معه اعزكم الله كل واحد منهم يجر الثاني مادري وش حادهم على الشقى.. يمكن لانهم ماينجبون اطفال صاروا يفرغون الحنان المتراكم في كلابهم.. بيني وبينكم اول ماشفت الكم الهائل من الكلاب تذكرت على طول (ابوياسر) قلت في نفسي وينك عنهم تعال طب وتنق, المهم.. وانا اتمشى مريت على هذي البوابه الكبيره
اعجبني منظرها وقلت يالله ندخل ونشوف وش وراها, صارت هذي البوابه تودي لجسر للمشاة
هذا الجسر يمر على نهر
الجهه المقابله من النهر
صرت اتمشى على الجسر يمين ويسار واتفرج على خلق الله ولافيه رجالين يمشون مع بعض كل واحد يمشي مع وحده وياليتهم يمشون زي الناس,
مايتركون حركاتهم لافي شارع ولا عند اشاره ولا في اتوبيس
المهم ماعليكم من حركاتهم نرجع لموضوعنا
وانا جالس ادربي راسي لفت نظري وجود شي غريب على هذا الجسر المفروظ مايكون هذا مكانه ابداً لكن وش جاب هذا الشي هنا؟!!!
شفتلي بنت عندها طاوله عليها عشرات الاقفال اللي هي موضوعنا!!!
!!!!!
وش جاب هذي الاقفال على جسر مافيه ولا باب عشان يتقفل؟؟!!
في العاده اشوف ناس يبيعون ورد او نظارات وشنط يدويه او عده ومفكات لكن اقفال غريييبه!!!
رجعت التفت للجهه الثانيه شفتلي وجه مألوف لي, بنقالي عنده طاوله ثانيه لكن اكبر وعليها بعد اقفال
وجع!!
وش يسوون هذولي؟
وشهيله هذي الاقفال؟
اللي اعرفه ان البنقاليين مايبيعون الا عرق او يمررون مكالمات هذا وش جابه هنا؟!
لكن قلت يمكن هذا البنقالي سمع ان الراجحي في بداية حياته كان يبيع اقفال وصار الحين مليونير وناوي يسوي مثله
رحت للبنقالي, على قولتهم وجه تعرفه ولا وجه تنكره
سلمت عليه
وكنت مستحي اسأله عن هذي الاقفال لانه كان وضعها طبيعي بالنسبه لهم ولا فيه احد مستنكر الوضع
قلت له انت عايش هنا من زمان
قال لي 15 سنه وكان يتكلم لغه البلد بطلاقه
قالي انت سعودي (طلع ذهين)
قلت ايه
قال انا اشتغلت في السعوديه قبل 15 سنه لكن الحين نسيت اللغه العربيه
قلت له كنت تبيع عرق في السعوديه
قال لا ماعرف العرق (يمكن في ذاك الوقت مابعد احتكروه ولا يعرفونه)
علمته وشو العرق قال مافيه داعي ابيع عرق هنا لان المشروبات متوفره برخص التراب ولو اصنع عرق هنا بيسجنوني ويودوني في ستين دهيه لكن عندكم في السعوديه اي واحد يسوي مشكله يسفرونه على طول
قلت هذا اللي خلى عيال عمك يلعبون فينا لعب
المهم قلت وش تشتغل الحين
قال ابيع اقفال
تمام وصلت للي ابي
قلت له ليش تبيع اقفال؟
قال عشان اي يواحد يحب وحده او يبغى يهدي زوجته هديه
!!!
قلت له يهدي حبيبته او زوجته قفل؟!
قال لا.. يشترونه مني ويكتبون اساميهم عليه ويحطون التاريخ وبعدين يقفلونه في المواصير المنتشره على الجسر وبعدين يرمون المفتاح في النهر
قلت ليش هذا كله؟
قال علشان يبقون يحبون بعض ولا ينفصلون عن بعض طول ماهذا القفل في مكانه ومقفل
بعدين قالي انت ماتشوف المواصير اللي على الجسر كيف مليانه من الاقفال واشر لها
انا طالعت للمواصير وذهلت من المنظر شي مهول اعداد هائله من الاقفال على كل ماصوره وكل عمود وكل زاويه وفي اي مكان يصل له القفل
طلعت الكمره وصرت اصور العمدان والمواصير في كل مكان الين تعبت
وهذي الصور
.
.
.
.
بعد مانتهيت من التصوير ناداني البنقالي
قالي ماتبغى تشتري قفل
قلت لا
قال ماعندك حبيبه
قلت الا عندي
قال خلاص اذا تحبها لازم تشتري قفل وتكتب اسمك واسمها والتاريخ عليه وترمي المفتاح في النهر
الصراحه احرجني
وقلت بالمصري (مابدهاش) وبالنجدي (مامنهاش)
لازم اشتري قفل واكتب عليه اسمي واسم حبيبتي والتاريخ واقفله في وحده من المواصير مانيب اقل منهم في شي
وشريت القفل منه وسوالي تخفيض علشان صار صديقي وكتبت اسمي عليه واسم حبيبتي والتاريخ لكن مارميت المفتاح في النهر تركته معي
وهذي صوره قفلي
.
.
.
.
تتوقعون توصل عندنا هذي الظاهر؟
بالنسبه لي اتمنا توصل عندنا
على الاقل معبره ولها معني سامي ونبيل ورخيصه
واكثر ماكثر الله عندنا الشوارع والمواصير وعمدان الانوار
لكن المشكله ماعندنا نهر عشان نرمي فيه المفاتيح
بس اتوقع اللي ساكنين جنوب الرياض والحاير ماعندهم مشكله في رمي المفاتيح في النهر
واللي بعيدين عن جنوب الرياض يدورون اقرب سد
والله لايهينهم
مما قرأت وأعجبني
اختكم
صبر السنين
تعليق