منقول) بس ضحكني والله كتيييييييييير

اكتب والنوم يداعب عيني..فصفقته وقلت ماداعبت اخواني الصغار علشان اداعبك انت ووجهك
الايام تمر..والساعات قهوه..
عندما تكون الساعه الثانيه ليلا..والناس نيام..وانت قيام..وفاتح الانترنت(( بكسر الظاء)) وتجلس لتتصفح..وتدور في المواقع..وتخرج من منتدى لتدخل في اخر..فان اول شئ يخطر ببالك في هذه اللحظه..هو.....والله مدري..المهم..
عاد بي شريط الذكريات الى الوراء..(( ويعني العاده يعود الى الامام))...وتذكرت الماضي..(( احسبك تذكرت المستقبل))...وقلت لماذا لااتوغل في بحر الماضي..فالماضي جميل..وذكرياته حلوه..
تذكرت حارتنا القديمه..مع انها هي نفس حارتنا هذي..لكن الحين صار فيها زبايل اعزكم الله..

تذكرت ايام ماكنت دلوع جدي..وكنت المدلل...حتى اني اذكر في مره من المرات طلب جدي مني كأس ماء امام الرجاجيل (( بضم الصاد))..فقلت له انقلع..ورديت به...فردعني بالباب ايما ردعه..وقاللي الشرهه ليست عليك..الشرهة (( بضم الفتحه)) على ابوك اللي ماعرف يربيك...وكان ابي موجودا في ذلك الوقت..وسمع كل الكلام..فقام من مكانه متجها لجدي..ونظراته تخترق جدي..فخفت كثيرا..وتمنيت انه يمسحها بوجهي هالمره...ولكن ابوي توجه الي..وبدأت نظراته تخترقني...فتمنيت ان يمسحها بوجه جدي هالمره...

ثم بدأ بالتوجه الى عمي الاصغر..ونظراته تخترقه..فخفت على عمي كثيرا..ولكني لم اتمنى ان يمسحها بوجهي هالمره...ثم توجه الى خالي الكبير..فقلت تستهبل انت..ترا القراء طفشوا..فقال ولكني ابحث عن كأس ماء لجدك...فقلت قطع الله سوالفك (( بفتح الضمه))..لقد اعتقدتك انك تنوي شيئا اخر...(( ماتلاحظون انقلبنا فصحى..كله من القلاعيه الله لايعودها))..

المهم..كانت عندي ذكريات جميله جدا جدا..لكن والله مدري وين حطيتها..وكل ماسألت الوالده العزيزه...قالت كلمتها المشهوره..دورها منا ولا منا...فأزداد حيرة على حيرتي..ولكنني املك بعضا منها في الدرج (( بتسكين لام العله))...لحظة بس اروح اجيبها.....


تأخرت عليكم..معليش..بس الوالد طالبني اعمله المساج اليومي اللي يبدا من الساعة ثنتين ونص وينتهي ثنتين ونص الا خمس.....المهم..جبت معي كم ذكرى من ذكرياتي الحلوه...هذه ذكرى بعد ان بلغت الخمسة طعشا..كان الكل يقول لوالدي..ماشالله صار رجال..(( كانوا متوقعين اصير حرمه يعني))...فأتفاخر بنفسي..وامشي بكل كبرياء ((بتسكين السكون))...واصبحت احس انني يجب ان اجالس الرجال في كل مجلس..وان افعل مايفعلونه...لاني على حسب ماقالوا اللي يشوفوني مع ابوي اني صرت رجال..

اتذكر انه كان في يوم من الايام عندنا عزيمه..فقلت للوالد لاتشيل هم وانا ولدك..اللي تبيه بسويه لك..وببيض وجهك قدام الرجاجيل..قال ابوي كفو والله..والنعم فيك..ثم توجه الى خالي الصغير..لالا..امزح عليكم..ماصارت كل شوي متوجه لواحد...المهم قلت للوالد امرني وانا انفذ..فقاللي رح جب القهوه وصبها لهم واحد واحد..الى ان يخلصون..وبعدين رح جب لهم الشاهي والنعناع..وبعدها رح جهز العشاء مع اهلك...وبعدها عود بقهوة جديده..و..و..و..

بيني وبينكم حسيت اني استعجلت شوي في كلامي..لكني قلت يالله ياولد..صرت رجال ولازم تتحمل..المهم وصلوا بعض الرجاجيل..وصبيت لهم القهوه..لكن في واحد من الرجال قام يهز الفنجال..قلت وش يبي ذا..وقلتله بأسلوب لطيف..لو سمحت انتبه لاتكب القهوه على الموكيت...فجاء الوالد وهو يبتسم بابتسامه فشله ورفسني رفسة حنان وكانه يقول الله ياخذك وياخذ اللي يجيبك معه عند الرجاجيل..المهم كملت صب القهوه.. ولما هممت بالخروج ..اتوا باقي الرجاجيل..فرجعت بالقهوه وصبيت لهم..ولما هممت بالخروج (( حلوه هممت))..اتى بعض الرجال..فرجعت بالقهوه وصبيت لهم...وقلت لهم انتم الحين ورى ماتجون كلكم مع بعض مره وحده...ضج المجلس بالضحك..والوالد قام يضحك من غير نفس..وقرب مني ولكزني لكزه فيها شوية الم..وكأنه يقول لايكثر ورح جب الشاهي...ولكن رح جب مويه قبل..فرحت اجيب المويه وانا ماسك الجيك بيديني الثنتين (( احسبها يدينك الثلاث))...وانا في الطريق تعثرت بنعله احد الرجال الافاضل..وانكب على وجهي شوية مويه...فقلت والله فشله ادخل عند الرجال ووجهي كله مويه...فرحت على طول وغسلت وجهي ورجعت (( تصرف نبيه))...

المهم انتهت العزيمه على خير حسب اعتقادي الشخصي...لكن الوالد حسيت ان في عيونه نظرات عتاب..هذا طبعا بعد ماصفقني في الصاله..وكأنه الى الان مافضى حرته فيني..لكن الاهم هو الذكرى الحلوه..


لحظه ياشباب فيه مشكله بسيطه..


احم...


والله مشكله ياشباب اذا كنت مندمج وتكتب موضوع في الانترنت والساعه قربت من ثلاث الفجر..وفجأة تهبط يدان بسرعة الصاروخ على كتفيك لتلتفت وتجدها الوالده العزيزه..وهي تقول وش قاعد تسوي الى الحين..وتجلس تناظر وتشوف وش قاعد تسوي وتقول عساك ماتروح لمواقع خرابيط وسربته..والا تكلم وتغازل بنات خلق الله..وانا اكون في قمة البراءة واقولها لا وش دعوه..انتي تعرفيني...ماني راعي هالحركات...وفجأه تدخل عليك وحده بالماسنجر وتقول هلا حبيبي الى الان سهران..فتنظر اليك الوالده باستغراب وتقول وش هذا...فالتفت بابتسامه غبيه..ودقات القلب تمشي مليون..ابد والله هذا واحد من زملاي يحي يستهبل علي دايما ياحليله وياخف دمه مايعقل عن حركاته البايخه...

لكن الوالده صراحة تفكيرها متفتح..وهالاشياء تعتبرها اشياء عاديه..وماتهتم لها كثير..فاكتفت برفستين وكم كف من النوع المميز..وكم دعوه من دعواتها المستجابه بأن الله ياخذني..والجني يخطفني..والبحر يبلعني..بس

المهم..في عندي بعض من الذكريات من ايام الطفوله..اتذكر اني اول مره اروح مع اهلي لجده..(( يعني اول كان يروح لحاله))..واتذكر اني من اول يوم ضعت عن اهلي..وصرت امشي وادج لحالي في شوارع جده وحواريها القديمه..وصرت امشي وانا كلي خوف..بس الصراحه مانزلت مني ولادمعه..كلها خلصت من الصياح اول ماضعت..المهم صرت امشي واشوف ناس اجناس واشكال والوان..وشفت اثنين قاعدين يتكلمون بلغة غريبه..عرفت انها اللغه الصينيه..فقلت الحمدلله الحمدلله الحمدلله الف مرة اني ماني صيني..لاني بصراحه مااعرف اتكلم صيني..يعني كنت بتورط..

المهم صرت امشي وامشي وانا ادور اهلي..يمكن انهم منا ولا منا على قول الوالده الله يحفظها...شفت واحد يبيع خبز والظاهر انه يمني..فقلتله اهلي ضايعين..وش اسوي؟؟..
فقاللي روح دورهم يمكن تقدهم منا ولا منا!!!...قلت شكل هذا يقرب للوالده..فترجيته انه يساعدني..وقلت الله يخليك..فرحمني ووداني لقسم الشرطه..اللي بدورهم دوروا وبحثوا عن اهلي منا ولامنا..حتى وجدوهم..احتضنتني الوالده بكل حنان الامومه ودعت علي بكم دعوه من دعواتها المستجابه بأن الله ياخذني..والجني يخطفني..والبحر يبلعني...لاني على حسب ماقالت خليتها تخاف وترتاع علي...وايضا خربت عليها طلعة السوق اللي كان الوالد واعدها فيها من يومين..


المهم..الانسان مهما واجه من مصاعب في حياته (( بقلب الف التأنيث))..تبقى له ذكرى جميله في حياته..

الساعه الان قربت على الثلاث ونص...وانا الظاهر تعودت على السهر....
تصدقون ان امس جلست الى الساعة ست الصبح سهران...وبصراحه استغربت..ليش انا سهران الى الساعه ست الصبح..غريبه..ست الصبح وانا سهران...لكن فعلا اذا عرف السبب بطل العجب...اكتشفت في الاخير اني نسيت انام...


وتصبحون على خير............