يوم شفتك في صباح العيد ضيعت التهاني
من عيونك ما قدرت انطق حروف الابجديه
توها كلمة (عساك بخير)بتلامس لساني
بس ما ادري في وجودك كيف خانتني التحيه
في حضور الحب من يقوى على شرح المعاني
السكوت أبلغ تراه من الحكي والصدق نيه
ياحبيبي جيتك هاليوم عندي شكل ثاني
كن وجهك لي هلال العيد ويدينك هديه
لك وصلت بدون لاأمشي وانا واقف مكاني
جية الدنيا بشوفك تختلف عن كل جيه
ياحلو عيد توشح من صدى صوتك أغانى
به تباشير الصباح تنفست والشمس حيه
كل عطر مارسا فى شفتك ما له موانى
من أريجك عاتب الكادي ورود النرجسيه
بالفرح عيدك سعيد ونام فى حضن الاماني
وان جرحك الوقت مره خلها جروحك عليه