السلام عليكم ورحمة الله وبركاته ...
أما بعد :


مساكم الله بالخير ...



وشلونكم ..




وشلون كلن باسمه ...



عساكم طيبين...



المهم خلونا في موضوعنا ..


أمس جالس بعد مهمة عمل شاقة (( ميشن إمبوسبل.. مع فارق التوقيت)) .. أنا مع واحد من الشباب ندردش ونسولف عن برنامج من سيربح المليون ... وهل يا ترى ممكن بيفوز أحد بالمليون اللي نسمع به ولا شفناه .. ومن هو اللي بيكسر حاجز ال 250,000 ريال ؟.. سألت زميلي وقلت له : جربت تكلمهم قال لي : بصراحه ما ني متصور إني في يوم باكون على ذاك الكرسي المرتفع قدام المرعب جورج قرداحي .. وبعدين حتى لو قدر الله وصار واشتركت أول سؤال راح يسألني باجاوب غلط .. لأنه بصراحه طريقته مع الموسيقى تربش الواحد.. والمعلومة اللي في راسك تطير حتى لو كنت تعرفها .. يذكرني في أحد المدرسين الجبابرة اللي كان ما يتفاهم إلا ((بالبونيه)).. والخيزرانة اللي تغير لونها من كثر الجلد ((من ثوارتك !!)) .. قلت له من تقصد قال المقدم وهو فيه غيره (شكله محقق في جرائم ما هو مقدم برامج ) .. وخصوصا لا صار يطالع فيك ويقول لك (( جواب نهائي )) .. وانت قلبك يرقع تقول المليون لك وارثها أبا عن جد وبيسحبونها عليك !! المهم أنا صرت أتخيل شكل زميلي وهو مرتبك (وضايع وجهه) وأضحك وقلت في نفسي ليه ما أجرب واكلمهم يمكن يصير لي نصيب واشترك معاهم واربح لي كم مية ألف .. (( لأني قنوع جدا وماحبش الطمع!!)) .. طنت براسي أكلم MBC يمكن ترد علي ((وجه العنز رزان وارزل بها )) وفعلا استلمت الجوال و كلمت ورد علي الكمبيوتر اللي مغطني في مقدمه طويله عريضه (( حسيت في لحظتها إن الجوال صار أثقل من شنطة مليونهم!!! )) .. جاوبتهم على المعلومات اللي يبونها كلها وانا انتظر السؤال أبي أجاوب وافتك !! .. وصاروا يعيدون المعلومات اللي قلتها مره ثانيه وانا على أعصابي (( أجل وشلون لو صرت قدام قرداحي .. أنشهد ان مصافق الركب يبي يدهر !! )) .. وصلت للسؤال وانا مجهز قلم وورقه وزميلي متحمس عيونه طايره و شدوقه صافقة الطاوله (( ذكرني شكله لحظتها بصديقي يوم كان يستنى خبر زوجته هي جابت ولد أو بنت )) .. وأفكر وش اعمل بالمليون .. وكيف باستلمها .. لأني ناوي انشالله بعد ما افوز بالمليون إني أشترط عليهم تكون كلها أمهات خمس - عشان يسهل علي توزيعها عليكم (( إييييييييه ما عليه يا الوليد !! )) .. لأنها أخف وشوفها أصلا يرد الروح .. وفي لحظة .. وانا انتظر .. قالت السؤال بعد ما نشف دمي وخلصت ووضعت الإختيارات الأربعه وكان السؤال يقول: من هو مخرج الفيلم الأجنبي (ذهب مع الريح) ... ؟ المهم إني قعدت بها من جد .. وما كنت متوقع ذا السؤال بالمره .. نقزت أصيح واقول لزميلي من هو المخرج الله يرحم والديك .. تكفى تراني توهقت .. قال لي ( يا رجال توكل على الله وخذ لك واحد من هالإختيارات وانت وحظك ) ... المهم إني اخترت اسم واحد منهم كان شكل إسمه مختلف شوي عن الباقين .. وكانت الإجابة رقم 2 ..


وفجأة ...

















وانا أنتظر رد الكمبيوتر ..














وانا متحمس و( صرت في نفس موقف الرجال -ولد ولا بنت) :


















ومع العلم إني ما قد سمعت بهالفلم ولا أسماء المخرجين ..














رد علي الكمبيوتر وانا كنت فاقد الأمل .. وكان عندي إحساس إن جوابي خطأ ..




















(( الجواب خاطيء حاول مره أخرى ......!!!! )) !!!!!!!!!!!!!!!!!!!!!







آآآآآآآآآآآآآآآآآآآآآآآآآآآآآآآآآآآآه يا قلبي .. آآآآآآآآآآآآآآآآآآآآآآآآآه يا حظي ..





آآآآآآآآآآآآآآآآآه يالقهر يا نا س .. هذي آخرتها ...حتى ما فيه أي دعوه ... خلاص لا يخلوني أشارك بس أبي دعوة أكون من الجمهور على الأقل !!!!!!!!!













إلتفت لزميلي وكان يطالع فيني بنظرات سخرية .. وهو كاتم ضحكة في صدره .. لو طلعها كان مت على طوووووووول .. بس أشوى انه قدر موقفي وصار يواسيني ويقول لي :


الله يعوضك ..

قلت له وانا مذهول ومنصدم في موقف تراجيدي .. كيف؟ وشلون؟ يعني اربع دقايق و20 ثانية راحت هباء منثورا ((من بغى الدح ما قال آح !!)) .. خلاص راحت هدر .. (( أي هدرالله يرحم والديك إلا يطلعونها من ورى علباك آخر الشهر يا حدء!! )) ..


المهم مابي أطول عليكم (( وش عقبه !! )) .. رجعت أدراجي وانا أعاني من نزيف مالي متوقع آخر الشهر .. وخيبة أمل .. في حلم ضائع.. وآماني ماتت في مهدها ..(( عظم الله أجرك!!))


وفجأة طرت على بالي فكرة جهنمية وهي إني أكلمهم مره ثانيه قبل ما يمديهم يغيرون السؤال واختار رقم 3 لأني شاك إنه الجواب الصحيح !! (( أمحق جهنمية إلا مدمغية !! )) .. وفعلا كلمت وتفاجأت إنهم مغيرين السؤال وكان يقول السؤال ذا المره:










وش تتوقعون ...
















لبس العروس في الصين وش لونه ؟ (( أبيض-أحمر-أخضر-أصفر))..



دورت أي صيني قريب ..عشان أسأله واقاسمه المليون .. مالقيت ..
إنقهرت ..

بس خطرت على بالي خطة رايقة .. إني أعطيهم ركبه واقفل الخط بدون ما أجاوب ((أحلى يا مدوخهم !!)) ..

وكلمت المرة الثالثة والثالثة على قولتهم ثابته وكان السؤال بمثابة القشة اللي قصمت ظهر البعير :


- في أي مكان كان أول ظهور(( الميني جب )) : إنجلترا-إيطاليا-فرنسا-ألمانيا ؟

وكان جاوبي أفلقني يا جورج قرداحي كاني كلمت مره ثانية..((أصلا محد درى عنك !!)) ...



فردت علي اللي في الكمبيوتر وقالت لي :

(( إفلقني أنت إن رديت عليك مره ثانيه يالبقره !! )) ... (( فضيحة ذا الكاشف!!))
















وأعلم أني لم تصبني مصيبة .... من الدهر إلا قد أصابت فتى قبلي


====