السلام عليكم ورحمة الله وبركاته

البارح الساعه 2.30 في الليل قاعد اتفرج على مسرحية الزعيم يمكن للمره المدري كم ,, وفجأه ما شوف الا وذي الدنيا سواد انقلبت قدامي قلت اعوذ بالله وش في ,, الظاهر ان الكهربا انقطعت,, الحين في نص الليل وش السالفه
,,, لا وللي مطينها اني ساكن في شقه لوحدي مقابل شقة اهلي ,, ومافي نور,,يمه وينك,, قمت وانا اسبح واستغفر,,, وش فيكم كنت خايف ,,, ياالله مافي عندي شمعه ولا كشاف ولا اي مصدر اضائه,,, والجو بدا يقلب حر اوففف ,

المهم اخذت مفاتيح سيارتي قلت اتسكع في الشوارع شوي لين تجي الكهربا ومنها نبرد شوي في مكيف السياره,,, فتحت باب الشقه اتفاجىء ان انوار الدرج شغاله تمام وشقة الاهل كمان شغاله الانوار,, افا يعني شقتي ليش وش في,, لا لا لازم اتصل بطوارىء الكهربا وشوف وش السالفه,,, رفعت سماعة التلفون ودقيت 933 :


انسر مشين يرد بكل ادب واحترام ويطلب مني تجهيز بيانات الاشتراك والمنطقه,,,
قفلت السماعه ورحت ادور على اي فاتوره قديمه لان فيها المعلومات,,, والدنيا ظلمه وحر شديد وشغال على الولاعه ادور في الادراج,,, اللي يشوفني يقول جيمس بوند زماني,,, واخيرا لقيتها بعد وقت طويل ,,,رجعت واتصلت ثاني :
انسر مشين :يرد بكل ادب واحترام ويطلب مني تجهيز بيانات الاشتراك والمنطقه
شوي يقطع الانسر مشين ويشتغل صوت التلفون يعني لازم احد يرفع السماعه بعد تقريبا 3 الي 4 دقائق يرد واحد الووووه (مصحيه من النوم)

السلام عليكم
وعليكم السلام نعم
لو تسمح الكهربا مقطوعه عندي بس في شقتي والطبلون في شقتي شغاله
كل العدادات فيه,,, الظاهر انه من الطبلون الرئيسي في الشارع.
دقيقه خلك معاي
ok
بعد شوي جا يقول(الفاتوره في ايدي ايعطيه البيانات) وين ساكن
قلت له تقصد رقم العداد
يخوي فين ساكن وش اقرب مكان جنبك
عطيته الوصف
كم رقم التلفون
وهذا رقم التلفون
خلاص انتظر عند التلفون راح تجي الصيانه ويتصلون فيك انقطع الخط ( الكلام هذا تقريبا الساعه 3 )

الساعه 4.30 اتصل مره ثانيه ونفس الحركه ويرد واحد ثاني
يخوي انا متصل من ساعه ونص للصيانه ومنتظر عند التلفون لاكن ماحد اتصل
وش السالفه (هو مقاطعني )
يخوي ماجاني احد ( انا شوي معصب)
عطني بياناتك من جديد
خذ هذي بياناتي
رحت غرفة النوم وفكيت الشباك علشان يدخل شوية هوا قلت اريح شوي
عيني غفت شوي الا وما اسمع الا صوت دق على الباب تقولون ال FBI جايه تكفش قاتل كيندي
قمت من النوم مفجوع ( من وين جت ذي المويه تحتي ) خخخخخخخ امزح لاتصدقون
وينرزع الباب مره ثانيه انا بصوت عالي ممزوج بالخوف ( قلت جني حاقد وجته فرصه) مين؟
الا ويطلع الوالد ( طبعا هو عوايده كذا) افتح الباب فتحت الباب قام يناظر فيني وشفيك مطفي الدنيا ,,, الكهربا مقطوعه ليش مقطوعه,,,, وش دراني,,,يالله المسجد سريع صلاة الفجر انشاء الله,, طيب لو اتصلوا هذولي واللييييل وش اسوي الحين ( طبعا هذا الكلام في نفسي) راح الوالد للمسجد توضيت وصليت في البيت,, ورحت اراقب الطريق لين تخلص الصلاه علشان اخرج الشارع وسوي نفسي توني جاي من المسجد,,, وفعلا نجحت الطريقه...

الساعه 6.30 والله لو موظف الكهربا جنبي كان اكلت من كبده من الحقد
ركبت السياره ورحت الف لف في الشارع افطرت في مطعم ابو زيد (معصوب بالقشطه) ,, وخذيت فره على البحر لين السعه 8 اتصلت بشركة الكهربا ,,,رد واحد صوته دوبه
ماخذ تهزيء من المدير,,, حكيت له الحكايه وقلت له ها بشر انشاء الله اشتغلت قال وش دراني هو بيتي ولا بيتك,, قلت له بيتي قال وش دخلني تسالني قلت يمكن عطوكم خبر عن البلاغات المنتهيه,,, قال متى اتصلت قلت له الساعه 3 في الليل قال لا ما يمديهم,, انت انتظر عند التلفون من الحين الي الساعه 4 العصر.
قلت له وانا بايعها شايفني شغاله عندك في البيت تلطعوني من الساعه 3 في الليل والحين تقول لي انتر الي الساعه 4 العصر وش فيكم انتم ترانا بشر ماحنا حيوانات..
قال قول الكلام ذا لحقون الصيانه لا تقول لي ياه ولا ترفع صوتك ياسيد,,,ضحكت في وجهه,,
قال وش تقصد قلت له مع السلامه وقفلت في وجهه.

تصوروا ياناس جبت كهربائي سوالي المشكله واخذ بس خمسين ريال.. يالحقارة الموقف يعني المسئله كلها خمسين ريال.ههههههههه
اليوم الخميس الساعه 8 في الليل اتصل منير (حارس العماره) على جوالي يقول لي في ناس هنا يبغونك قلت مين قال شركة الكهربا ( الساعه 8 في الليل) قال لي هلا وين الطبلون الخربان قلت له بدري كان جيتوا في الليل الساعه 3 خلوها تكمل 24 ساعه قال وش تقول يعني هذا جزاتنا,,, شوف لك غيرنا يسوون الكهربا,, قلت له لا تكفى ياخوي الله يخليك شغل الكهربا وضحكت من قلبي ياناس من قلبي,, ,,,قلت له تراني مسويها من الصبح مع السلامه.وقفلت السماعه.

ياخوان والله انك تحس نفسك محتقر لمن تتعامل مع ذولي الناس نصيحتي
( هين قرشك ولا تهين نفسك )
والسلم عليكم ورحمة الله وبركاته