ضاقت الدنيا

**جلال الخالدي** · 21-06-2001, 12:31 AM

صح لسانك يالأسير ... على هالقصيده الجميله جدّاً ....

أبدعت وتفننت ياشاعر ... مع إن القافيه صعبه .... بس ماهي صعبه عليك ....

ومنّي لها .... عساها تسمع ....

الاسير اليوم يـابنيّه حـزيـن . . . . والحزن ضـمّ الجهات الاربعه

وش عـلامك تهجرين ولاتجين . . . . وش عـلامك في حبيبك قاطعه

ليه فـي وصلك بخيله من سنين . . . . لـيه مـاتوفين فـي حقّك معه

كـان في قلبك غـرامٍ مـايبين . . . . لاتخبّي لا تقـولـي بـأخدعه

بالهوى مخلص وفي حبّك سجين . . . . لـك يـونّ وكنّي والله اسمعه

روفـي بـحاله عسى قلبك يلين . . . . للـذي حبّك بـوسـط المعمه

تقبّل هذه المجاراه المتواضعه

تحياتي لك وبالتوفيق ياشاعرنا

**الأسير** · 21-06-2001, 01:05 AM

ماخليت لنا شيء

أخي جــلال حيرتني
من وين أجيك
تفضل هذي الأبيات:
صاحبـي اللي رمـاني مايبين00000000000له ثلاثه شهور ويمكن أربعة
غايب عنـي وأنا كلي حنين00000000000وإن قطعني حالفٍ له ماقطعه
هايـم بحبه وأنا تـوي جنين00000000000 لعنبوه الشوق جـاني مسرعه
عقـرب تقرص ودايم ماتبين00000000000 في لدغها كنها داب المزرعه
مايجينـي باهي الخد والجبين000000000000ناوي يتلفنـي وأنا قلبي معه
سامـعٍ فينـي كلام الآخرين000000000000وأنا قول اللي حكى ماأسمعه
جعل من غير وليفي ياحسين000000000000تقبل الدنيـا عليـه وتصقعه
ياجلال أنظر ترىكني سجين000000000000تكفى شوف الزين كودك تقنعه

**جلال الخالدي** · 21-06-2001, 06:52 PM

الحال من بعضه

لا تـذكّرني بجرحي هـالدفين . . . . لاتصحّي الـحـب لا لا تـدفعه

حالي مـن حالك وأنا والله حزين . . . . مـن سبايب حِـلوةٍ ومـدلـّعه

فارقتني مـن شهور ومن سنين . . . . ولا خبر منها ولا صوت أسمعه

لاصـديق ولا حبيب ولا عوين . . . . ولا طريق يجيبها وأنـا أتـبعه

عقبها مـازان فـي عيناي زين . . . . عقب مـن هـي بالحشا متربّعه

يـالأسير أشكي وأبكي ولايبين . . . . والـدمـع غـصـبٍ عليّا أمنعه

مـالك إلا الصبر كود إنها تبين . . . . وتحضن الغالي وتضم الأذرعه

أطـلـب الله يفرج الهم الدفين . . . . وألتقي ويّـاه وأستانس مـعـه

وسلامتكم

**ليالي الشوق** · 21-06-2001, 09:34 PM

الأسير***

قصيدة جميلة ..أيها الأسير ..أهنئك على حسك الشاعري ..
أين كان غيابي أنا ؟...لقد حولتما المكان الى مساجله ..انت وجلال ...وانا ..آخر من يعلم ..
لكن الحقيقه ...ابدعتما ...كلاكما .....
تحياتي لكما ...وشكرا على الإهداء يا اسير

**الأسير** · 21-06-2001, 09:45 PM

الأخ/ جــــــلال

التواضع سمة من سماتك وهذا ما ألاحظه من ردودك 0
ولكن أبيات شعرك التي أرسلتها تثبت العكس وأجزم أنك شاعر وأي شاعر !!!
إنك شاعر من الطراز الأول ، أهنيك على تواضعك وصدق الشاعر الذي قال:
ملأى السنابل تنحني بتواضعٍ 000000000والفارغات روؤسهن شوامخ0
هذا أقل وصف أتقدم به إليك وأرجو أن تقبل هذه الأبيات مني:
ياجـلال اطلب وانا لأمرك عوين0000000000لو تبـي رشـاش ولاّمـدرعه
لاتكبرها تـرى كل شـي هوين 000000 000لو تمـادى صاحبـك لأردعه
والله المعبـود رب المسلمـين0000000000لاتقصـى في طريقـه وأتبعه
وانصحـه واعطيه هرج العاقلين0000000000وإن تسنـع ولاّ حتـم أسـنعه
واقهـر الحسـاد وكل العاذلين0000000000واسعـد بشـوفك إذا شفتك معه
وتكتب كتابك وأنا مـن الشاهدين0000000000والمهـر لاتدفعـه أنـا أدفعه
ناذرٍ نـذرٍ علـي والنـذر دين0000000000لأضرب الطيران والطبل أقرعه
خلهـا ليلـة عمـر تذكر سنين00000000000من سمـع فيها تجيه الصرقعه
حـالفٍ حلفين والثالـث يمين00000000000إن حبل الوصـل فيكم ماقطعه
واتعنا لك معـي كـبش سمين00000000000وناكـل الكبـده أنا وانته معه
بس هـونهـا ولاتصـدر أنين00000000000والوصل بين المخاليق ازرعه

**الأسير** · 21-06-2001, 10:45 PM

الأخت /ليالي الشوق

حسيت بعدم ردودك وخشيت لاسمح الله صابك مكروه لاأقل ولا أكثر 0
على العموم الله يحفظك من كل مكروه0
وبالنسبة للأخ/جلال إتضح إنه شاعر من أصحاب المعلقات الذين يتقنون سرعة الرد0
وأكبر دليل إنه أحد مشرفين هذا المنتدى بجانبك0
أكرر شكري لك0

**جلال الخالدي** · 22-06-2001, 01:46 PM

تحياتي لك يالأسير وشاكر لك كرم هالأخلاق والكلام الطيّب ....

يالأسير الطيب مـن عندك يبين . . . . يالأسير الـطـيـب عندك منبعه

وأنت والله مخلص ووافي وأمين . . . . وأنت صاحب بالظروف الموجعه

أنت عون وأنت لـي سورٍ متين . . . . إمتمكن بـالـجـهـات الأربعه

يـاذخر لاصار مـاعندي عوين . . . . يـاصـدى طـيبٍ عليّه مرجعه

وليتها ليلة عـمـر والحاضرين . . . . كـنـهم مـاجـوا بليّا الاربعه

العروسه بعد مـاجـا الوالدين . . . . والأسير الـلـي بـجوفي مربعه

دمـت يالغالي على مر السنين . . . . دمـت يـاللـي الطيب ماتتصنّعه

واعسى مـايصيبك بدنياك شين . . . . واعسى عيون العـدو تهل أدمعه

واعسى الغالي على قلبك حنين . . . . واعـسـى ويّـاه تـهنى بمهجعه

قلت ماعندي وأنا قلبي حزين . . . . والقلب بـالـصـدر يصدر قرقعه

أشكرك ياشاعر بهرجك رزين . . . . والشـكـر مـن بيتنا للمجمعه

وسلامتكم

**الأسير** · 22-06-2001, 10:41 PM

الأخ/ جــــــلال

أشكر ردك الساخن يا شاعر الخليج

ياعـريب الجـد ياأبن الطيبين000000000000الهـوى خـلاني بالدرب إمعه
والهـوى ذل الشيـوخ الأولين000000000000قيس وعنتر قِد غدوا بالمعمعه
وانا شف حـالي غدا بالأرذلين000000000000ثوبي فوق متوني عجزان أرفعه
ماتبين صاحبـي وقلبـي حزين000000000000منه قلبـي غـاديٍ لـه قرقعه
إنظر دموعـي على خدي سنين000000000000والفتـى دايـم يمسّـح مدمعه
ما أنام الليـل تسمـع لي ونين000000000000ونتي يسمعهـا من في المجمعه
حايرٍ ما اعرف شمالي واليمين000000000000وجاهـل بكل الجهات الأربعه
افزعوا لي يالعرب يالمسلمين000000000000قولـوا وين الشـور وانا بتبعه
افزعوا لي دام انا عقلي رزين000000000000قبل ما انجـن والسبب المبرقعه
لعنبوها كيف سـوت بالحزين000000000000الهنـوف اللـي علينـا مدلعه
ياجلال أبغى الوعـد منك يبين000000000000صاحبـي حتمـا تجيـه وتقنعه

**جلال الخالدي** · 22-06-2001, 11:44 PM

هلا الاسير .... لا تطلعني سما

تراي منكم وفيكم

عـنـد خشمك مطلبك والله يعين . . . . والله يـسـهّـل عـليّه وأقنعه

لا تعاف الروح ولا تغدي حزين . . . . لا تـهـل العين كـف الأدمعه

لـلأسـف ماقدّرت ذيك السنين . . . . مـالـقـت للـحـب شيٍّ يشفعه

وللأسف محبوبتك ماتشوف زين . . . . لـو تعرفك كـان عادت مسرعه

ماعرفت إنها تركت أحلى السنين . . . . والحبيب اللي سكنت في أضلعه

هـي خـسـارتها كبيره يافطين . . . . لوني منّك هالهوى والله أصفعه

وأتـرك الـحب الذي بليّا حنين . . . . وألتقي فـي خـل انا اسعد معه

لا يـهمّـك مطلبك والله يعين . . . . واعساني يالـخـوي لـك اقنعه

مير لو تبغى المشوره يالحزين . . . . خلّها عـنـك ولـو هي مبرقعه

وسلامتكم

**الأسير** · 23-06-2001, 05:35 PM

الأخ/ جــــــلال

أخي جلال أنت شخص متواضع إلى أبعد الحدود رضيت أم أبيت(هذه هي الحقيقه)0
وعذراً على هذه الدخلة القوية0
وبعدين بيني وبينك وعد لم تفي به حتى الآن، إلى متى تريد مني الإنتظار ؟؟؟؟؟؟؟
0000000000000000000000000وأرجو أن تتكرم وتقبل هذه الأبيات مني:

الهـوى يالخـالدي سمـه دفيـن00000000000جرحي وسط القلب غادي موسعه
معشـر العشـاق صـاروا خايفين00000000000كل منهـم شـايـلٍ كفنـه معه
يحتـرون الموت صـاروا جالسين00000000000الوفـاة صـارت تجيهم مسرعه
الهـوى مالـه أمـان يافطيـن00000000000في قلـوب الناس سوى الزعزعه
والكفـن عنـدي حملتـه باليميـن00000000000جاني كاس الموت وصرت أتجرعه
والوصيـة عندكم يالحـاضـرين00000000000الأسيـر لو مـات مـن بشيـعه
وإن سأل عن صاحبه صافي الجبين000000000000قولـوا مـات ودافـنٍ سره معه
كم ينادي يومـه حي ولا تجين00000000000كم رسـالة قـد رسلهـا مشمـعه
كنت قلبه وفـوق عرشه تجلسين00000000000وكنت عنـده فـي حيـاتـه مدلعه
ماينـام الليـل وكنت ترقديـن000000000000كان ليّـن لـيش هالقسـوه معه
منتـدانـا روز يشهـد باليقيـن00000000000بالأسيـر اللـي تجـدد مصـرعه

**جلال الخالدي** · 23-06-2001, 07:02 PM

السلام

وين الإزدواجيه في الرد ... مافي .... سحِر بحِر

تدري عاد في ناس تخالفك .... وتقول مغرور جدّاً

وش العمل ؟

جـاني ردّك ياولد ماهو بزين . . . . وش تقول اليوم وش هالصرقعه

أذكـر الله وإنت هوّنها ويعين . . . . ربّـك اللي بالسما بـك يجمعه

وإن تـفارقتوا وخانتك السنين . . . . غـيرها يـاكثر وحـده مبرقعه

والجمال يصيح منّه الناظرين . . . . والمفاتن بـالـجـسـد متجمّعه

من خلقها كم خلق وجهٍ حسين . . . . لا تعيش الـحـزن لا تتجرّعه

راحت وخلّها فدالك ألف عين . . . . ومـن يعافك جعل باصٍ يصقعه

يـاولـد يانسل نـاسٍ طيّبين . . . . لا تـهـاون دوم راسـك إرفعه

جعلها فـي همٍّ وجرحٍ وبين . . . . جـعـلها مـاتذوق راحتها معه

جـعلها تندم وتصرخ نادمين . . . . وأنـت كنّك صوتها مـا تسمعه

لا تـفرّح يالخوي هالحاسدين . . . . والـشـمـاته والله إنها موجعه

جـعلها خيره وتنسيك السنين . . . . حـب ماضي ماهو بيدك ترجعه

أدري الحب القوي الحب الدفين . . . . صعب نسيانه وصعبٍ تردعه

مير هذي قسمتك في هالسنين . . . . والـقـدر لا صار مأحدٍ يمنعه

وسلامتكم

**الأسير** · 23-06-2001, 07:23 PM

لاتجنني

والله إني شايف لي ردين في الصفحة وبعد ماتلقيت ردك إختفى واحد من الردود 0
الظاهر إشتغلت الدنبوشه 0
الله يكفينا الشر وبسم الله علينا وعليكم 0

**جلال الخالدي** · 23-06-2001, 07:25 PM

ضحكتني

الدنبوشه هاه

أنا شلتهن يالأسير

والسموحه منك

**الأسير** · 23-06-2001, 07:50 PM

إذا ممكن ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

أخي جلال إذا ممكن على الماسنجر
إذا تكرمت0

**الأسير** · 25-06-2001, 07:10 PM

الأخ/ جــــــلال

الأخ/جلال الخالدي
مساء الخير
أرجو معذرتي على التأخر بالرد وذلك لظروفي العملية وإنشغالاتي العائلية0
00000000000000000000فأرجو قبول عذري وتقبل هذه الأبيات مني:
ياعرب ابغـى الجـواب اللي يقين00000000والحلول ابغاهـا عندي مجمّعه
ابغى شيـخ ٍ ابغـى سيد العارفين00000000ما ابغى واحد صاير ٍ كالإمعه
الخـالدي نعم الرجـال الباخصين00000000طيب ٍ هـو ضمنـي بين أظلعه
ما أظـن القـى مثيلـه هالسنيـن00000000راعي الفزعات وراعي المنفعه
راعـي الإحسـان شيخ المحسنين00000000كم يتيـم جـا وكفكـف مدمعه
فـارج الهِمـات عتـّاق السجين00000000داحـر العـدوان يوم الصرقعه
من عرفتـه خف حـزني مايبين00000000وإن تعـادى لي بشر هو يردعه
هو حرجنـي هو ملكني كالسجين000000000لو يطـول الوقت والله ماقطعه
راعي فطنه راعي حكمه هو فطين000000000يقنعـك وانـت أبـد ما تقنعه
اشهـد إنه قـد حفـر حب دفين000000000كيف نسّـاني هـوى المبرقعه
طيـب ٍ واللـه ولـد الطيبيـن000000000ياعسـى ربي يعـزه ويرفعه

**جلال الخالدي** · 25-06-2001, 07:33 PM

أهلاً بالأسير

والحمد لله يوم طابت جروحك ....ومشكور

هذا والله مقصدي وإنته فطين . . . . الـغـرض مـاهو لغير المنفعه

مقصدي والله ماشوفك حزين . . . . ومـن يجيب الـحزن ربّي يقلعه

ماعليك أي زود يابن الطيبين . . . . وطيبكم موروث وأعرف مرجعه

طيّب وشهمٍ ولك معدن ثمين . . . . غـاليٍ عندي ومقامك مـاأرفعه

وسع الصدر الذي منها حزين . . . . هـو يطيع الـوقت ولا أنتا طعه

لك سلام ولـك تحيّه يالعوين . . . . وأحـمـد الله يوم شفتك في سعه

وسلامتكم

**الأسير** · 26-06-2001, 10:10 PM

الأخ/ جــــــلال

أخي جلال أرجو تقبل هالأبيات مني:

يوم الأثنيـن المسا رد العوين000000000جانـي برد ٍ سـريع ٍ مسرعه
ياهـلا بأبن النشامى المسلمين000000000معرب الجدين واعرف مرجعه
اشهد اني قبل اعرفـك حزين000000000ويـوم عرفك والله إني بالسعه
انت ذخري صاير ٍ يدي اليمين000000000جعل من عاداك نشهد مصرعه
واعسى عمرك يمـدّد لك سنين000000000ومن نواك بشر لأخرق مسمعه
عندي أبيـاتك مثل كنـز ثمين00000000مثـل تاج فيــه لولو مرصعه

**الأسير** · 30-07-2007, 10:22 PM

الرد: ضاقت الدنيا

حنيت للذكرى

سقى الله ايامك بالخير اخوي جلال

يا ترى وين انت فيه الحين

ووين المشرفة اللي كانت معاك

بس حبيت اسجل حضوري واسأل عنكم

**مخلوقه ك النور** · 30-07-2007, 11:52 PM

الرد: ضاقت الدنيا

مشاركه اكثر من رائع ومشاعر
فياضه صادقه احييك عليها
اخي الاسير
تقبل مروري وتحياتي

ضاقت الدنيا

ضاقت الدنيا

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

مواضيع مرتبطة